చింతూరు, సెప్టెంబర్ 19: పోలవరం నిర్వాసితులకు మేలైన పరిహారం అందేదాక సిపిఎం పోరాటం చేస్తుందని భద్రాచలం ఎమ్మెల్యే సున్నం రాజయ్య అన్నారు. సోమవారం చింతూరు ఐటిడిఎ వద్ద సిపిఎం ఆధ్వర్యంలో చేపట్టిన 36 గంటల నిరాహార దీక్షా శిబిరాన్ని సందర్శించిన ఎమ్మెల్యే రాజయ్య మాట్లాడుతూ పోలవరం నిర్వాసితులకు పునరావాసం, పరిహారం కల్పించిన తర్వాతే ప్రాజెక్టు నిర్మాణం చేపట్టాలన్నారు.

విఆర్‌పురం, సెప్టెంబర్ 19: మండలంలో కాళ్లవాపు కేసులు ఇంకా వస్తున్న సందర్భంలో సీజనల్ వ్యాదుల పట్ల ప్రజలకు అవగాహన కల్పించాలని రంపచోడవరం ఐటిడిఏ పిఒ చక్రధరబాబు అన్నారు. సోమవారం ఆయన మండల పరిధి చినమట్టపల్లి గ్రామాన్ని సందర్శించి అక్కడి గిరిజనులతో మాట్లాడారు. గ్రామంలో ఎవరికైనా జ్వరాలు కాని, కాళ్లవాపులు కాని వస్తే వెంటనే ప్రభుత్వ వైద్యశాలకు రావాలని సూచించారు.

కాకినాడ సిటీ, సెప్టెంబర్ 19: గిరిజనులను ఇన్‌ఫార్మర్ల నెపంతో మావోలు హత్యలకు పాల్పడడం తగదని జిల్లా ఎస్పీ ఎం రవిప్రకాష్ హితవు పలికారు. ఏజెన్సీ ప్రాంతంలో గత జూలై 29వ తేదీన మావోల చేతులో హత్యకు గురైన పాస్టర్ వి మారయ్య ప్రభుత్వం ప్రకటించిన 5లక్షల రూపాయల ఎక్స్‌గ్రేషియాను ఆయన భార్య మంళదేవికి జిల్లా ఎస్పీ రవిప్రకాష్ అందజేశారు.

గండేపల్లి, సెప్టెంబర్ 19: ముఖ్యమంత్రి చంద్రబాబునాయుడు సోమవారం మధురపూడి విమానాశ్రయంలో అభివృద్ధి పనులకు శ్రీకారం చుట్టిన సందర్భంగా గండేపల్లి జాతీయ రహదారిపై జగ్గంపేట సిఐ కాశీ విశ్వనాథం సిబ్బందితో పోలీసు పికెటింగ్ ఏర్పాటు చేశారు. ఈ సందర్భంగా ఆయన మాట్లాడుతూ జాతీయ రహదారి వెంబడి వెడుతున్న వాహనాలను తనిఖీ చేసినట్టు చెప్పారు.