ఒంగోలు అర్బన్,జనవరి 18: ఆంధ్రప్రదేశ్, తెలంగాణా రాష్ట్రాలకు సంబంధించి ఇంకా గవర్నర్ నరసింహన్‌ను కొనసాగించటం అనైతికమని శాసనమండలి సభ్యులు, తెలుగుదేశంపార్టీ సీనియర్ నేత కరణం బలరాం ధ్వజమెత్తారు. గురువారం ఒంగోలులో జరిగిన ఎన్‌టిఆర్ వర్ధంతి సభలో గవర్నర్‌పై విమర్శలు చేశారు. యుపిఎ హయాంలో ఉమ్మడి ఆంధ్రప్రదేశ్‌కు నరసింహన్‌ను గవర్నర్‌గా నియమించారన్నారు.

విజయవాడ, జనవరి 18: రాష్ట్రంలో రైతుల ఆదాయం పెంపొందించేందుకు తీసుకుంటున్న చర్యల్లో భాగంగా కోల్డ్ చైన్ కార్పొరేషన్‌ను ఏర్పాటు చేయాలని అధికారులను ముఖ్యమంత్రి చంద్రబాబు నాయుడు ఆదేశించారు. డెయిరీ రంగంలో పెట్టుబడులను ఆకర్షించేందుకు వీలుగా విధానాన్ని రూపొందించాలని, దేవాలయాల్లో గోశాలను ఏర్పాటు చేయాలని తెలిపారు.

హైదరాబాద్, జనవరి 18: ఓఎన్‌జిసి సంస్థలో పనిచేస్తున్న ఫీల్డ్ ఆపరేటర్ల సర్వీసులను క్రమబద్ధీకరించాలని, వీరు గత 12 నెలల్లో 240 రోజులు పనిచేశారని హైకోర్టు ఓఎన్‌జిసి యాజమాన్యాన్ని ఆదేశించింది. 2016 డిసెంబర్‌లో సింగిల్ జడ్జి కోర్టు ఫీల్డ్ ఆపరేటర్ల సేవలను క్రమబద్ధీకరించాలని ఆదేశించింది. వీరు ఆంధ్ర, తెలంగాణలో 20 ఏళ్లుగా పనిచేస్తున్నారని కోర్టు పేర్కొంది.

న్యూఢిల్లీ, జనవరి 18: ఫిబ్రవరి ఒకటో తేదీన పార్లమెంట్‌లో ప్రవేశపెట్టనున్న బడ్జెట్‌లో ఆంధ్రప్రదేశ్‌కు ప్రాధాన్యత ఇవ్వాలని ఆర్థిక మంత్రి యనమల రామకృష్ణుడు కేంద్రాన్ని కోరారు. గురువారం కేంద్ర ఆర్థిక మంత్రి అరుణ్ జైట్లీ అధ్యక్షతన వివిధ రాష్ట్రాలు, కేంద్ర పాలిత ప్రాంతాల ఆర్థిక మంత్రులతో 2018-19 ప్రీ బడ్జెట్ సమావేశం జరిగింది. ఈ సమావేశానికి యనమల రామకృష్ణడు హాజరయ్యారు.