విజయవాడ, డిసెంబర్ 6: రాష్ట్రంలో నిరంతరాయంగా అందరికీ విద్యుత్ ప్రాజెక్టు కింద ప్రపంచ బ్యాంక్ నుంచి వివిధ విద్యుత్ సంస్థలు 240 మిలియన్ డాలర్ల మేర రుణాన్ని తీసుకునేందుకు రాష్ట్ర ప్రభుత్వం ఆమోదం తెలిపింది. అందరికీ విద్యుత్ కింద ప్రపంచ బ్యాంక్ 240 మిలియన్ డాలర్లను, మరో 160 మిలియన్ డాలర్లను ఎఐఐబి అందచేసేందుకు వీలుగా కేంద్రం ఒప్పందం చేసుకుంది.

గుంటూరు, డిసెంబర్ 6: రాష్ట్రంలో స్మార్ట్ నగరాల అభివృద్ధికి మాస్టర్ ప్లాన్ రూపకల్పన జరుగుతోంది. రెండు దశల్లో 9 నగరాలకు రెండు దశల్లో కాంప్రెహెన్సివ్ మొబిలిటీ ప్లాన్ (సీఎంపీ)ని సిద్ధంచేసే బాధ్యతను గుర్‌గావ్‌కు చెందిన మెస్సర్స్ యూఎంటీసీ సంస్థకు అప్పగించనున్నారు. ఇందుకు సంబంధించి త్వరలో అమరావతి మెట్రో రైల్ కార్పొరేషన్, పురపాలకశాఖలతో సంస్థ ఒప్పందం కుదుర్చుకో నుంది.

హైదరాబాద్, డిసెంబర్ 6: పోలవరం ప్రాజెక్టు నిర్మాణాన్ని పరిశీలించేందుకు వైఎస్‌ఆర్‌సిపి ప్రజా ప్రతినిధుల బృందం ఈ నెల 7వ తేదీన బయలుదేరుతుందని ఆ పార్టీ ఎంపి వైవి సుబ్బారెడ్డి తెలిపారు. పోలవరం ప్రాజెక్టుపై వస్తున్న ఆరోపణలు, కేంద్రప్రభుత్వ సాగదీత ధోరణి తదితర అంశాలపై క్షేత్రస్థాయి పోరాటానికి తమ పార్టీ అధ్యక్షుడు వైఎస్ జగన్ కార్యాచరణ రూపొందిస్తున్నారని అన్నారు.

విజయవాడ, డిసెంబర్ 6: బాబా సాహెబ్ అంబేద్కర్ రూపొందించిన భారత రాజ్యాంగ ఫలాలు దిగువ స్థాయి వారికి చేరాలంటే సచివాలయ ఉద్యోగుల బాధ్యతలే కీలకమని రాష్ట్ర ఎస్సీ, ఎస్టీ కమిషన్ చైర్మన్ కారెం శివాజీ అన్నారు. వెలగపూడి సచివాలయం 3వ బ్లాక్ మొదటి అంతస్తు సమావేశ మందిరంలో బుధవారం మధ్యాహ్నం సచివాలయ ఎస్సీ, ఎస్టీ ఉద్యోగుల సంఘం ఆధ్వర్యంలో నిర్వహించిన 62వ అంబేద్కర్ వర్ధంతి సభలో ఆయన మాట్లాడారు.