పిఠాపురం, మే 12: కాపుల స్థితిగతులపై జూన్ 1వ తేదీ నుండి 15రోజులపాటు రాష్టవ్య్రాప్తంగా సర్వే నిర్వహిస్తున్నట్టు రాష్ట్ర ఉప ముఖ్యమంత్రి, హోం మంత్రి నిమ్మకాయల చినరాజప్ప తెలిపారు. తూర్పు గోదావరి జిల్లా పిఠాపురంలో గురువారం ఆయన విలేఖర్లతో మాట్లాడారు. కాపులతో ప్రభుత్వం మైండ్ గేమ్ ఆడుతుందన్న ముద్రగడ ప్రకటనను ఆయన ఖండించారు.

హైదరాబాద్, మే 12: వైకాపా నుంచి టిడిపిలోకి ఫిరాయించిన ఎమ్మెల్యేలపై అనర్హత వేటు వేయాలని కోరుతూ వైకాపా ఎమ్మెల్యేలు చెవిరెడ్డి భాస్కరరెడ్డి, కె నారాయణ స్వామి, ఆర్ ప్రతాప్ కుమార్ రెడ్డి తదితరులు గురువారం అసెంబ్లీ ఉప కార్యదర్శిని కలిసి వినతిపత్రం సమర్పించారు. అనంతరం ఎమ్మెల్యే చెవిరెడ్డి భాస్కరరెడ్డి మాట్లాడుతూ వైకాపా ఎమ్మెల్యేలను ప్రలోభాలకు గురిచేశారని, చంద్రబాబు అనైతిక విధానాలకు పాల్పడ్డారన్నారు.

తిరుపతి: తాను పుట్టిన గడ్డ రుణం తీర్చుకోవాలంటే కేంద్ర మంత్రి వెంకయ్య నాయుడు ఎపికి ప్రత్యేకహోదాపై కాంగ్రెస్ ఎంపీ కెవిపి ప్రవేశపెట్టిన ప్రైవేటు బిల్లు లోక్‌సభలో ఆమోదం పొందేలా కృషి చేయాలని సిపిఐ నేత నారాయణ హితవు పలికారు. ప్రత్యేక హోదా విషయమై ప్రధాని మోదీ, కేంద్రమంత్రి వెంకయ్య, ఎపి సిఎం చంద్రబాబు నిజాయితీగా వ్యవహరించడం లేదన్నారు.

హైదరాబాద్: వచ్చే నెలాఖరునాటికి అమరావతి ప్రాంతానికి తాము వెళ్తామని ఎపి సచివాలయ ఉద్యోగుల సంఘం అధ్యక్షుడు మురళీకృష్ణ ప్రకటించారు. ఇక్కడ గురువారం జరిగిన ఉద్యోగుల సమావేశంలో ఆయన మాట్లాడుతూ, ఎపి రాజధానికి వెళ్లే సిబ్బందికి ప్రభుత్వం అన్ని సౌకర్యాలు ఏర్పాటు చేయాలన్నారు. నూతన రాజధానిలో వారానికి అయిదురోజుల పని విషయమై ప్రభుత్వం ఉత్తర్వులు విడుదల చేసిందని ఆయన తెలిపారు.