తిరుపతి: టెన్త్, ఇంటర్, ఎంసెట్ వంటి పరీక్షా ఫలితాలు ప్రకటించడం, వేసవి సెలవుల కారణంగా తిరుమలలో భక్తుల రద్దీ అనూహ్యంగా పెరిగింది. క్యూ లైన్లలో అన్ని కంపార్టుమెంట్లు కిటకిటలాడుతున్నాయి. ధర్మ దర్శనానికి 15 గంటలు, దివ్య దర్శనానికి 8 గంటలు, ప్రత్యేక ప్రవేశ దర్శనానికి 3 గంటల సమయం పడుతోంది. రద్దీ దృష్ట్యా క్యూ లైన్ల వద్దనే భక్తులకు మంచినీరు, ఫలహారాలను అందిస్తున్నారు.

విశాఖ: విశాఖ మున్సిపల్ కార్పొరేషన్ అధికారులు తగరపువలసలోని షాపింగ్ కాంప్లెక్సులో తన షాపును తొలగించడంపై మనస్తాపం చెందిన ఆటోమోబైల్ దుకాణం యజమాని కుమార్ శనివారం ఉదయం వొంటిపై పెట్రోలు పోసుకుని నిప్పంటించుకున్నాడు. స్థానికులు వెంటనే గమనించి కుమార్‌ను ఆస్పత్రికి తరలించారు. అతని పరిస్థితి విషమంగా ఉంది. కుమార్ ఆత్మహత్యకు యత్నించడం తగరపువలసలో సంచలనం కలిగించింది.

విశాఖ: జివిఎంసి పరిధిలోని మధురవాడ ప్రాంతంలో మంత్రి గంటా శ్రీనివాసరావు శనివారం ఉదయం పర్యటించి పారిశుద్ధ్యం తీరుపై ఆగ్రహం వ్యక్తం చేశారు. ఇద్దరు శానిటరీ ఇన్‌స్పెక్టర్లను సస్పెండ్ చేయాలని ఆయన అధికారులను ఆదేశించారు. పారిశుద్ధ్య పనుల్లో నిర్లక్ష్యం వహిస్తే సహించేది లేదని ఆయన హెచ్చరించారు.

కడప: వైకాపా అధినేత జగన్ సొంత జిల్లా కడపకు నీళ్లు ఇచ్చినా ప్రాజెక్టులకు అడ్డంకులు సృష్టించడం విడ్డూరంగా ఉందని ఎపి ఇరిగేషన్ మంత్రి దేవినేని ఉమ శనివారం ఇక్కడ విలేఖరులతో అన్నారు. పట్టిసీమ, పోలవరం ప్రాజెక్టులు పూర్తి కావడం జగన్‌కు ఇష్టం లేదని ఆయన వ్యాఖ్యానించారు. పట్టిసీమ ద్వారా 40 టిఎంసిల నీటిని ఆదా చేసి దాదాపు 4లక్షల ఎకరాలకు సాగునీరు ఇచ్చామన్నారు.