విశాఖ: విశాఖ జిల్లాలో ప్రఖ్యాతి చెందిన పాడేరు మోదకొండమ్మ ఉత్సవాల్లో బుధవారం బాణసంచా పేలడంతో తొక్కిసలాట జరిగి 13 మంది ఆస్పత్రి పాలయ్యారు. అమ్మవారి ఆలయం వద్ద బాణసంచా కాలుస్తుండగా నిప్పురవ్వ ఎగరిపడి తారాజువ్వల కట్టపై పడింది. దీంతో ఒక్కసారిగా తారాజువ్వలు జనంపైకి దూసుకుపోయాయి. అనుకోని ఈ పరిణామానికి భక్తులు పరుగులు తీశారు. తొక్కిసలాటలో గాయపడిన వారిని పాడేరులోని ప్రభుత్వ ఆస్పత్రికి తరలించారు.

విశాఖ: మర్రిపాకల బూటకపు ఎన్‌కౌంటర్‌కు నిరసనగా ఈనెల 16న మన్యం బంద్ పాటించాలని మావోయిస్టు పార్టీ ఈస్ట్ డివిజన్ కమిటీ పిలుపునిచ్చింది. కొంతమంది ప్రజాద్రోహులు పోలీసులకు సహకరించడం వల్లే బూటకపు ఎన్‌కౌంటర్లలో మావోలు ప్రాణాలు కోల్పోతున్నారని కమిటీ బుధవారం ఒక ప్రకటనలో ఆరోపించింది. వన్యసంపదను దోచుకునేందుకు మన్యంలో యుద్ధ వాతావరణాన్ని ప్రభుత్వం సృష్టిస్తోందని కమిటీ పేర్కొంది.

నెల్లూరు: ఎపి అభివృద్ధికి కేంద్ర సర్కారు తగినన్ని నిధులను విడుదల చేస్తూనే ఉందని, ఈ సమయంలో ప్రత్యేక హోదా గురించి అంత ఆందోళన చెందాల్సిన పనిలేదని బిజెపి నాయకుడు ఆంజనేయరెడ్డి అన్నారు. హోదా విషయమై బిజెపిపై కొందరు టిడిపి నేతలు చేస్తున్న వ్యాఖ్యలు సమంజసంగా లేవన్నారు.

నెల్లూరు: జిల్లాలోని కృష్ణపట్నం పోర్టులో పైపులైన్లకు రంధ్రాలు చేసి కొనే్నళ్లుగా పామాయిల్‌ను చోరీ చేస్తున్న ముఠా సభ్యులను పోలీసులు బుధవారం అరెస్టు చేశారు. స్థానికంగా కొందరి అండదండలతో ఈ ముఠా పామాయిల్‌ను చోరీ చేస్తున్నట్లు పోలీసులు గుర్తించారు.