తిరుపతి, మే 10: శ్రీ భగవత్ రామానుజాచార్యుల సహస్రాబ్ది ఉత్సవాలను పురస్కరించుకుని రామానుజాచార్యులకు సంబంధించిన అధికారిక వెబ్ పేజ్‌ను ప్రారంభించాలని టిటిడి ఇ ఒ డి.సాంబశివరావు నిర్ణయించారు. మంగళవారం మహతి ఆడిటోరియంలో జరిగిన రామానుజాచార్యుల సహస్రాబ్ది ఉత్సవాల సదస్సులో పలు పుస్తకాలు, సీడీలను గవర్నర్ ఇ ఎస్ ఎల్ నరసింహన్ చేతుల మీదుగా ఆవిష్కరించారు.

కాకినాడ: ఎపికి ప్రత్యేక హోదా ఇవ్వాలంటూ వైకాపా ఆధ్వర్యంలో మంగళవారం ఇక్కడి కలెక్టర్ కార్యాలయం వద్ద మహాధర్నా జరిగింది. ఆ పార్టీ అధినేత జగన్ ధర్నా సందర్భంగా మాట్లాడుతూ, ప్రత్యేక హోదా విషయంలో కేంద్ర, రాష్ట్ర ప్రభుత్వాలకు చిత్తశుద్ధి లేదన్నారు. ప్రత్యేకహోదా ఇవ్వకుంటే రాష్ట్రం అభివృద్ధి చెందే అవకాశం లేదన్నారు.

తిరుపతి: ఏడాదిపాటు నిర్వహించే రామానుజ సహస్రాబ్ది ఉత్సవాలు మంగళవారం ఇక్కడ ప్రారంభమయ్యాయి. వచ్చే ఏడాది మే 10 వరకూ పలు ఆధ్యాత్మిక కార్యక్రమాలను నిర్వహించనున్నట్లు టిటిడి అధికారులు తెలిపారు. తెలుగురాష్ట్రాల ఉమ్మడి గవర్నర్ నరసింహన్ దంపతులు రామానుజ రథాన్ని ప్రారంభించారు.

కర్నూలు: కిడ్నాపర్ల బారి నుంచి ఓ బాలిక చాకచక్యంగా తప్పించుకుని తల్లిదండ్రుల వద్దకు మంగళవారం ఉదయం క్షేమంగా చేరింది. బాలిక మాధవి కథనం మేరకు వివరాలిలా ఉన్నాయి. మద్దికెర గ్రామంలో ఇంటి ముందు ఆడుకుంటున్న బాలికను ఆగంతకులు కిడ్నాప్ చేశారు. వారి కళ్లుగప్పి అక్కడి నుంచి ఆమె బయటపడింది. కిడ్నాపర్లు క్షుద్రపూజలు చేస్తున్నారని ఆమె చెబుతోంది. ఈ ఘటనపై బాలిక తల్లిదండ్రులు పోలీసులకు ఫిర్యాదు చేశారు.