శంఖవరం, జులై 4: ప్రత్తిపాడు నియోజకవర్గ కాంగ్రెస్ పార్టీ ఇన్‌ఛార్జిగా ఉన్న పర్వత శ్రీ పూర్ణచంద్ర ప్రసాద్ వైసిపి అధినేత వైఎస్ జగన్మోహనరెడ్డి సమక్షంలో హైదరాబాద్‌లో సోమవారం వైసిపిలో చేరారు. మండల కేంద్రమైన శంఖవరం గ్రామానికి చెందిన పర్వత ప్రసాద్ దివంగత మాజీ ఎమ్మెల్యే పర్వత సుబ్బారావు అన్న కుమారుడు.

అల్లవరం, జూలై 4: బోడసకుర్రు - పాశర్లపూడి వంతెనపై సోమవారం మారుతీ కారుకు నిప్పంటుకుని పూర్తిగా కాలిపోయింది. ప్రమాదం సమయంలో కారులో ఉన్న ఇద్దరు వ్యక్తులు బయటకు దూకేయడంతో ప్రాణ నష్టం తప్పింది. కారు అమలాపురం వైపు నుండి పాశర్లపూడి వెడుతుండగా వంతెన మధ్యకు వచ్చేసరికి మంటలు చెలరేగాయి. ఈ సందర్భంగా వంతెనపై సుమారు గంటసేపు రాకపోకలు నిలిచిపోయాయి. అల్లవరం పోలీసులు కేసు దర్యాప్తు చేస్తున్నారు.

రావులపాలెం, జూలై 4: అధికారం కోసం గత ఎన్నికల సమయంలో ప్రజలకు ఎన్నో హామీలిచ్చిన చంద్రబాబు నేడు ఆ హామీలను తుంగలోకి తొక్కి అన్ని వర్గాల ప్రజలను మోసగించారని, దీనిపై కాంగ్రెసు ప్రజల పక్షాన నిలబడి ఇక నుండి నెలకొక ఆందోళన ద్వారా ప్రభుత్వంపై వత్తిడి తెచ్చే ప్రయత్నం చేస్తుందని డిసిసి అధ్యక్షుడు కందుల దుర్గేష్ అన్నారు. సోమవారం రావులపాలెం సిఆర్సీ ఆడిటోరియంలో డిసిసి సమావేశం జరిగింది.

తిరుపతి, జూలై 4: శ్రీవారి దర్శనార్థం విచ్చేసే భక్తులకు అన్నప్రసాదాల తయారీ, ఇతర టిటిడి అవసరాలకు సంబంధించి బియ్యం, పప్పుదినుసులు, జీడిపప్పు తదితర సరుకులను 15 రోజులకు సరిపడా నిల్వ ఉంచుకోవాలని టిటిడి ఇఓ డాక్టర్ డి.సాంబశివరావు మార్కెటింగ్ అధికారులను ఆదేశించారు. తిరుపతిలోని టిటిడి పరిపాలనా భవనంలో గల కార్యాలయంలో సోమవారం సీనియర్ అధికారులతో ఇఓ వారపు సమీక్షా సమావేశం నిర్వహించారు.