న్యూఢిల్లీ: ప్రకృతి వ్యవసాయ సాగును పెంచేందుకు నీతి ఆయోగ్ దృష్టి సారించింది. నీతి ఆయోగ్ వైస్ చైర్మన్ రాజీవ్‌కుమార్ నేతృత్వంలో జరిగిన సమావేశానికి వివిధ రాష్ట్రాల వ్యవసాయ శాఖ కార్యదర్శులు హాజరయ్యారు. వ్వవసాయ విశ్వవిద్యాలయాల ఉపకులపతులు కూడా హాజరయ్యారు. రైతులు వారి అనుభవాలను వివరించారు.

శ్రీనగర్: జమ్మూకాశ్మీర్‌లోని పోషియాన్ జిల్లాలో కుందలన్ ప్రాంతంలో ఓ ఇంట్లో ఉగ్రవాదులు తలదాచుకున్నారనే సమాచారంతో భద్రతాబలగాలు ఆ ఇంటిని చుట్టుముట్టాయి. భద్రతాబలగాలకు, ఉగ్రవాదులకు జరుగుతున్న ఎదురుకాల్పుల్లో ఇద్దరు ఉగ్రవాదులు హతమైనట్లు తెలిసింది. మరో ఇద్దరు జవాన్లు గాయపడ్డారు. నలుగురు పౌరులు గాయపడ్డారు. ఈ నేపథ్యంలో అల్లరిమూకలు చెలరేగి భద్రతాబలగాల మీద రాళ్లు రువ్వాయి.

విశాఖపట్నం: చత్తీస్‌గఢ్ పరిసర ప్రాంతాల్లో ఒడిశాకు ఆనుకుని ఉపరితల ఆవర్తనం ఏర్పడటంతో తెలుగురాష్ట్రాల్లో రాగల 24 గంటల్లో వర్షాలు కురుస్తాయని విశాఖపట్నం వాతావరణ శాఖ వెల్లడించింది. కోస్తాంధ్రలో చెదురుమదురు జల్లులు, రాయలసీమలో జల్లులు, ఉత్తర తెలంగాణలో విస్తారంగా వర్షాలు పడతాయని వాతావరణ శాఖ వెల్లడించింది.

న్యూఢిల్లీ: కేంద్ర ప్రభుత్వం పనుల నిలిపివేత ఆదేశాలపై ఉన్న స్టేను మరో సంవత్సరం పాటు పొడిగించటంతో పోలవరం ప్రాజెక్టు పనులకు ఉన్న ప్రధాన అడ్డంకి తొలగిపోయింది. కేంద్ర పర్యావరణ శాఖ మంత్రి హర్షవర్దన్ సోమవారం ఈ ఆదేశాలు జారీ చేశారు. హర్షవర్దన్ ఈ ఆదేశాన్ని జారీ చేయటంతో పోలవరం పనులు ఎలాంటి అంతరాయం లేకుండా సాగిపోతాయి. పోలవరం ప్రాజెక్టుకు 2005లోనే పర్యావరణ అనుమతులు లభించాయి.