న్యూఢిల్లీ, జూలై 8: వచ్చే లోక్‌సభ ఎన్నికల్లో ప్రజలు బీజేపీకి వరుసగా రెండోసారి పట్టం కట్టనున్నారని, తమ ప్రభుత్వం అమలు చేస్తున్న సంక్షేమ పథకాల ఫలాలు ప్రజలకు చేరుతున్నాయని కేంద్ర మంత్రి ముక్తార్ అబ్బాస్ నఖ్వీ అన్నారు. దేశంలో ముస్లింలతో కలుపుకుని 30 నుంచి 35 శాతం ఉన్న మైనార్టీ ఓటర్లు బీజేపీకే ఓటు వేస్తారని ఆయన చెప్పారు. మైనార్టీల సంక్షేమానికి బీజేపీ కట్టుబడి ఉందన్నారు.

చెన్నై: దేశంలో ఏడాదికి రెండు సార్లు నీట్ పరీక్షలను నిర్వహించాలన్న కేంద్ర నిర్ణయాన్ని తమిళనాడు వ్యతిరేకించింది. ఈ విధానం ఏమాత్రం సమర్థనీయం కాదని స్పష్టం చేసింది. తమిళనాడులో ప్రతిపక్ష డీఎంకే కూడా నీట్, జేఈఈ ప్రవేశ పరీక్షలను ఏటా రెండుసార్లు జరపాలన్న ఆలోచనపై మండిపడింది. ప్రతిసారీ నీట్‌పై గందరగోళ పరిస్థితులను సృష్టించడమే కేంద్ర ప్రభుత్వ లక్ష్యంగా కనిపిస్తున్నదని ధ్వజమెత్తింది.

న్యూఢిల్లీ, జూలై 8: రష్యాతో కలిసి సంయుక్తంగా ఫైట్ జెట్ విమానాలను తయారు చేయాలనే ప్రాజెక్టుపై భారత్ పునరాలోచనలో పడింది. భారీ ఖర్చును దృష్టిలో ఉంచుకొని, ఫిఫ్త్ జనరేషన్ ఫైటర్ ఎయిర్‌క్రాఫ్ట్ (ఎఫ్‌జీఎఫ్‌ఏ) జెట్ తయారీపై భారత సర్కారు వెనుకంజ వేస్తున్నట్టు సమాచారం. ఈ విషయంపై రష్యా ప్రభుత్వంతో చర్చలు జరిపేందుకు భారత సమాయత్తమవుతున్నది.

న్యూఢిల్లీ, జూలై 8: ఢిల్లీలోని బురాని ప్రాంతంలో సంచలనం సృష్టించిన 11 మంది అనుమానాస్పద మృతి వెనుక గల పూర్తి కారణాలను పోలీసులు ఇంకా నిర్ధారించలేకపోతున్నారు. దీనివెనుక కారణాలు తాంత్రికమైనవా? మానసిక పరమైనవా? ఆర్థిక పరమైనవా అన్నదానిపై పోలీసులు ఎలాంటి నిర్ధారణకు రాలేదు. ఢిల్లీలోని బురారి ప్రాంతంలో 11 మంది కుటుంబ సభ్యులు అనుమానాస్పద స్థితిలో మృతి చెంది వారం రోజులు గడిచాయి.