బెంగళూరు: ఇక్కడి హిందుస్థాన్ ఏరోనాటిక్స్ లిమిటెడ్ (హెచ్‌ఎఎల్) సంస్థ రూపొందించిన స్వదేశీ తేలికపాటి యుద్ధ విమానం తేజస్ దేశ వైమానిక దళంలో చేరింది. ఇక్కడ శుక్రవారం జరిగిన ఒక కార్యక్రమంలో దక్షిణాది వైమానిక దళం అధిపతి ఎయర్ మార్షల్ జస్బిర్ వాలియా సమక్షంలో రెండు తేజస్ విమానాలను హెచ్‌ఎఎల్ అందజేసింది. ఈ ఏడాది 6, వచ్చే ఏడాది 8 తేజస్‌లను వైమానిక దళం సమకూర్చుకుంటుందని అధికారులు తెలిపారు.

నెల్లూరు, జూన్ 30: దేశంలో రైల్వే రంగంలో వౌలిక వసతులు, నూతన రైల్వే మార్గాల ఏర్పాటుకు ప్రణాళికలు సిద్ధం చేస్తున్నామని దక్షిణ మధ్య రైల్వే (విజయవాడ డివిజన్) ఎడిఆర్‌ఎం వేణుగోపాల్ రావు అన్నారు. నెల్లూరు జిల్లా కేంద్రంలోని ప్రధాన రైల్వే స్టేషన్‌ను గురువారం ఆయన తనిఖీ చేశారు.

విశాఖపట్నం, జూన్ 30: విశాఖ జిల్లా సబ్బవరం మండలంలో దాదాపు 655 కోట్ల రూపాయలతో ఇండియన్ ఇన్‌స్టిట్యూట్ ఆఫ్ పెట్రోలియం అండ్ ఎనర్జీ (ఐఐపిఇ)ని ఏర్పాటు చేయనున్నారు. ఈ విద్యా సంవత్సరం నుంచి ఎయులో ఇది తాత్కాలికంగా పని చేస్తుంది. మూడేళ్లపాటు ఐఐటి ఖరగ్‌పూర్‌ను ఐఐపిఇకి మెంటారింగ్ చేసేందుకు వీలుగా గురువారం ఆంధ్ర విశ్వవిద్యాలయంలో ఒప్పందంపై సంతకాలు చేశారు.

న్యూఢిల్లీ, జూన్ 30: గత రెండు నెలల్లో మొదటి సారిగా పెట్రోల్, డీజిల్ ధరలు తగ్గాయి. పెట్రోల్‌పై లీటరుకు 89 పైసలు, డీజిల్‌పై లీటరుకు 49 పైసలు తగ్గిస్తున్నట్టు ఇండియన్ ఆయిల్ కార్పొరేషన్ ప్రకటించింది. తగ్గించిన ఈ ధరలు గురువారం అర్థరాత్రి నుంచే అమల్లోకి వచ్చాయి. వీటి ప్రకారం ఢిల్లీలో లీటరు పెట్రోలు రూ. 65.65 నుంచి 64.76 పైసలకు తగ్గింది. అలాగే డీజిల్ లీటరు రూ. 55.19 నుంచి 54.76కు తగ్గింది.