కాకినాడ, మే 9: ఆంధ్రప్రదేశ్ రాష్ట్రానికి ప్రత్యేక హోదా కన్నా పోలవరం ప్రాజెక్టు నిర్మాణమే ముఖ్యమని ఆంధ్రప్రదేశ్ ఎన్‌జిఒల సంఘ నేత పరుచూరి అశోక్‌బాబు వ్యాఖ్యానించారు. బహుళార్థ సాధక ప్రాజెక్టు పోలవరం నిర్మాణం పూర్తయితే రాష్ట్ర ప్రజలకు అనేక ప్రయోజనాలుంటాయన్నారు. ప్రస్తుతం ఈ ప్రాజెక్టును పూర్తిచేసే అంశానికే కేంద్ర, రాష్ట్ర ప్రభుత్వాలు అధిక ప్రాధాన్యతనివ్వాలని ఆయన సూచించారు.

గుంటూరు, మే 9: పార్లమెంట్‌లో రాష్ట్ర విభజన సమయంలో ప్రవేశపెట్టిన ఏ బిల్లులోనూ ఆంధ్రప్రదేశ్‌కు ప్రత్యేక హోదా ఇచ్చే విషయంపై ఎలాంటి ప్రస్తావన లేదని రాజ్యసభ మాజీ సభ్యుడు యలమంచలి శివాజీ అన్నారు. సోమవారం గుంటూరులోని తన నివాసంలో ఏర్పాటు చేసిన విలేఖర్ల సమావేశంలో ఆయన మాట్లాడుతూ రాష్ట్ర విభజనకు సహకరించిన ఆనాటి అధికార, ప్రతిపక్ష పార్టీలు ప్రస్తుతం ప్రత్యేక హోదాపై మాట్లాడటం హాస్యాస్పదమని విమర్శించారు.

పార్వతీపురం, మే 9: తిరుమల వెంకన్న లడ్డూలో నల్లజెర్రి కనిపించడంతో ఓ భక్తుడు కలవరపడ్డాడు. ఈ సంఘటన విజయనగరం జిల్లా పార్వతీపురంలో సోమవారం వెలుగుచూసింది. వివరాలు ఇలా ఉన్నాయి. పార్వతీపురం పట్టణంలోని రామాపురం కాలనీకి చెందిన గౌరీ పట్టాపుదేవీప్రసాద్ కుటుంబసభ్యులతో కలిసి ఈనెల 3న తిరుమల శ్రీవేంకటేశ్వరస్వామివారి దర్శనం చేసుకుని 4న ఇంటికి చేరుకున్నాడు. వెంట వెంకన్నస్వామి ప్రసాదం లడ్డూలు తెచ్చుకున్నాడు.

చిత్తూరు: వైకాపాకు చెందిన మదనపల్లి ఎమ్మెల్యే తిప్పారెడ్డి టిడిపిలో చేరనున్నట్లు మంత్రి బొజ్జల గోపాలకృష్ణారెడ్డి సోమవారం ప్రకటించారు. ఆయన మదనపల్లిలో పర్యటించిన సందర్భంగా టిడిపిలోకి రావాలని తిప్పారెడ్డిని ఆహ్వానించారు. జగన్ వైఖరి నచ్చకే వైకాపా ఎమ్మెల్యేలు టిడిపిలో చేరుతున్నారని బొజ్జల అన్నారు. రాష్ట్ర అభివృద్ధిని ఆశిస్తున్నందునే వైకాపా ఎమ్మెల్యేలు జగన్‌కు గుడ్‌బై చెబుతున్నారన్నారు.