విజయవాడ: అక్రమాలకు పాల్పడి జైలుకు వెళ్లి వచ్చినవారు సైతం తనను విమర్శిస్తున్నారని, అయినా ప్రజల కోసం తాను అన్ని అవమానాలను వౌనంగా భరిస్తున్నానని ఎపి సిఎం చంద్రబాబు అన్నారు. ఇక్కడ బుధవారం వైకాపా ఎమ్మెల్యే రవికుమార్ టిడిపిలో చేరిన సందర్భంగా ఆయన మట్లాడుతూ, రాష్ట్ర ప్రతిష్టను దెబ్బతీసేలా కొందరు వ్యవహరిస్తున్నారని పరోక్షంగా వైఎస్ జగన్‌పై విమర్శలు గుప్పించారు.

విజయవాడ: ప్రకాశం జిల్లా అద్దంకి వైకాపా ఎమ్మెల్యే గొట్టిపాటి రవికుమార్ బుధవారం ఇక్కడ ఎపి సిఎం చంద్రబాబు సమక్షంలో తెలుగుదేశం పార్టీలో చేరారు. ఆయనతో పాటు పలువురు జడ్పీటీసీ, ఎంపీటీసీ సభ్యులు, సర్పంచ్‌లు, సహకార సంఘాల అధ్యక్షులు, ఇతర నాయకులు టిడిపి తీర్థం పుచ్చుకున్నారు. మంత్రి శిద్ధా రాఘవరావు, ఎపి టిడిపి అధ్యక్షుడు కళా వెంకట్రావు తదితరులు పాల్గొన్నారు.

తిరుపతి: రాష్ట్రంలో పరిశ్రమలను స్థాపించే జపాన్ కంపెనీలకు అన్ని విధాలా సహాయ సహకారాలు అందిస్తామని ఎపి సిఎం చంద్రబాబు అన్నారు. ఆయన బుధవారం చిత్తూరు జిల్లా పర్యటన సందర్భంగా శ్రీసిటీలో ఇసుజు కార్ల తయారీ యూనిట్‌ను ప్రారంభించారు. ఇసుజు వాహనాలకు రోడ్డు టాక్స్ రద్దుచేస్తామని, శ్రీసిటీలో అన్ని సౌకర్యాలు కల్పిస్తామని ప్రకటించారు.

విశాఖ: విశాఖ ఏజెన్సీలోని హుకుంపేట మండలం పనసకుట్టు గ్రామంలో 16 మందిలో ఆంథ్రాక్స్ వ్యాధి లక్షణాలున్నట్లు వైద్యులు గుర్తించారు. వీరిలో 11 మందిని వెంటనే వైద్య చికిత్స కోసం విశాఖ కింగ్‌జార్జి ఆస్పత్రికి తరలించారు. పనసకుట్టులో ఆంథ్రాక్స్ వ్యాధి బయటపడడంతో ఏజెన్సీ గ్రామాల్లో ఆందోళన మొదలైంది.