విశాఖ: పవర్ గ్రిడ్‌లో పదే పదే సాంకేతిక లోపాలు తలెత్తడంతో శ్రీకాకుళం, విజయనగరం, విశాఖ జిల్లాల్లో రెండు రోజులుగా విద్యుత్ సరఫరాకు తీవ్ర అంతరాయం కలుగుతోంది. పలు విద్యుత్ సబ్ స్టేషన్లలో, ఫీడర్లలో సాంకేతిక ఇబ్బందుల వల్ల అనధికారికంగా విద్యుత్ కోతను అమలు చేస్తున్నారు. చాలా ప్రాంతాల్లో సోమవారం సాయంత్రం నుంచి మంగళవారం ఉదయం వరకూ విద్యుత్ సరఫరా లేనందున జనం ఉక్కపోతతో అలమటించారు.

కాకినాడ: ఈనెల 29న జరిగే ఎంసెట్‌కు సకల సన్నాహాలు పూర్తయినట్లు ఎపి ఎంసెట్ కన్వీనర్ ప్రొఫెసర్ సాయిబాబా మంగళవారం మీడియాకు తెలిపారు. ఈ ఏడాది ఎంసెట్‌కు మొత్తం 2.92 లక్షల మంది దరఖాస్తు చేశారని, ఇందులో ఇంజనీరింగ్‌కు 1.89 లక్షలు, మెడిసిన్‌కు 1.03 లక్షల మంది ఉన్నారని, ఒక్క నిమిషం ఆలస్యంగా వచ్చినా పరీక్షకు అనుమతించే ప్రసక్తే లేదన్నారు.

కర్నూలు: శ్రీశైలం నుంచి పాతినిధ్యం వహిస్తున్న వైకాపా ఎమ్మెల్యే బుడ్డా రాజశేఖర రెడ్డి ఈనెల 28న టిడిపిలో చేరేందుకు ముహూర్తం ఖరారైంది. ఆ రోజున విజయవాడలో చంద్రబాబు సమక్షంలో ఆయన టిడిపిలో చేరతారు. ఈ సందర్భంగా భారీ ఎత్తున కార్యకర్తలు, నేతలతో తరలివెళ్లాలని ఆయన భారీ సన్నాహాలు చేస్తున్నారు.

తిరుపతి: కోయంబత్తూర్‌కు చెందిన సత్యవాణి, సంపత్‌కుమార్ దంపతులు తిరుమలలోని రామ్‌బగీచ అతిథిగృహంలో ఆత్మహత్య చేసుకున్న ఘటన మంగళవారం వెలుగుచూసింది. మూడు రోజులుగా గది తలుపులు తెరవక పోవడంతో అతిథిగృహం ఉద్యోగులు పోలీసులకు ఫిర్యాదు చేశారు. బలవంతంగా తలుపులు తెరిచిచూడగా దంపతులు ఉరి వేసుకుని మరణించినట్లు కనుగొన్నారు.