ఒంగోలు: విజయవాడ వైపు వెళుతున్న లారీని వెనుక నుంచి కారు ఢీకొనడంతో నలుగురు వ్యక్తులు అక్కడికక్కడే మరణించిన ఘటన టంగుటూరు టోల్‌గేట్ వద్ద గురువారం ఉదయం జరిగింది. కారులో ప్రయాణిస్తున్న నలుగురూ ప్రాణాలు కోల్పోయారని, మృతులు తమిళనాడుకు చెందినవారని పోలీసులు తెలిపారు.

విజయనగరం: తెలుగుదేశం పార్టీలో చేరేందుకు రంగం సిద్ధం చేసుకున్న బొబ్బిలి ఎమ్మెల్యే సుజయకృష్ణ రంగారావును బుజ్జగించేందుకు వైకాపా నేతలు ఆఖరి ప్రయత్నాలు ప్రారంభించారు. సుజయకృష్ణను కలిసేందుకు వైకాపా నేతలు విజయసాయి రెడ్డి, కోలగట్ల వీరభద్రస్వామి గురువారం ఉదయం బొబ్బిలి వచ్చారు. సుజయకృష్ణ కోటలో లేరని అక్కడివారు చెప్పడంతో ఆయన కోసం వైకాపా నేతలు ఎదురుచూస్తున్నారు.

విజయవాడ: ఎపిలో డబుల్ బెడ్‌రూమ్ ఇళ్ల నిర్మాణానికి ఆ రాష్ట్ర ముఖ్యమంత్రి చంద్రబాబు అంబేద్కర్ జయంతి సందర్భంగా గురువారం శ్రీకారం చుట్టారు. ఎన్టీఆర్ గృహనిర్మాణ పథకం కింద రాష్ట్ర వ్యాప్తంగా అర్హులైన వారికి డబుల్ బెడ్‌రూమ్ ఇళ్లు నిర్మిస్తామని సిఎం ప్రకటించారు. జక్కంపూడిలో పదివేల ఇళ్ల నిర్మాణానికి ఆయన శంకుస్థాపన చేస్తూ, గృహనిర్మాణ పథకాలకు ప్రభుత్వం ప్రాధాన్యం ఇస్తోందన్నారు.

కడప, ఏప్రిల్ 13: ఆర్టీపిపి (రాయలసీమ థర్మల్ పవర్ ప్రాజెక్టు)ని నీటి సమస్య వెంటాడుతోంది. తెలుగుగంగలో అంతర్భాగమైన బ్రహ్మంసాగర్, మైలవరం ప్రాజెక్టుల నీటి వినియోగానికి ప్రభుత్వం అనుమతి ఇచ్చినా ఆ ప్రాజెక్టుల సమీపంలోని ప్రజలకు సాగునీరు మాటలావుంచి తాగునీరే గగనంగా మారింది. గతంలో ఆర్టీపిపికి బొగ్గుకష్టాలు ఉండగా, బొగ్గు కొరత పరిష్కారమై ఇప్పుడు నీటి కష్టాలు మొదలయ్యాయి.