చింతూరు/ఏలూరు , ఏప్రిల్ 13: నవ్యాంధ్రప్రదేశ్‌లో విలీనమైన ముంపు మండలాలకు ప్రభుత్వం అండగా నిలుస్తుందని, ప్రజలను అన్నివిధాలా ఆదుకుంటామని ముఖ్యమంత్రి చంద్రబాబు భరోసా ఇచ్చారు. రాష్ట్ర విభజనలో భాగం గా ఆంధ్రప్రదేశ్‌లో విలీనం చేసిన మండలాల్లో బుధవారం పర్యటించిన అయన పలు అభివృద్ధి కార్యక్రమాల్లో పాల్గొన్నారు. పశ్చిమగోదావరి జిల్లా కుకునూరు, తూర్పుగోదావరి జిల్లా చింతూరులో బుధవారం సిఎం పర్యటించారు.

కాకినాడ: తెలంగాణ నుంచి ఎపిలో విలీనమైన మండలాల్లో ముఖ్యమంత్రి చంద్రబాబు తొలిసారిగా బుధవారం పర్యటించి గిరిజనులను ఆకట్టుకునేందుకు ప్రయత్నించారు. చింతూరులో ఆయన అంగన్‌వాడీ కేంద్రాన్ని, ఉపాధి హామీ పథకం పనులను పరిశీలించారు. కూలీలతో కలిసి మట్టితట్టలను తలపైకి ఎత్తుకున్నారు. సబ్-ట్రెజరీ ఆఫీసును ప్రారంభించాక, గ్రామంలో పెట్రోల్ బంకు, ఎల్‌పిజి సిలిండర్ల గోడౌన్ నిర్మాణానికి శంకుస్థాపన చేశారు.

విజయవాడ: రాష్ట్రంలో చేనేత కార్మికులకు 110 కోట్ల రూపాయల రుణమాఫీని త్వరలోనే అమలు చేస్తామని ఎపి ఎక్సయిజ్, చేనేత శాఖల మంత్రి కొల్లు రవీంద్ర బుధవారం ఇక్కడ తెలిపారు. ఆధార్ లింకేజి లేనందున నేత కార్మికులకు రుణమాఫీలో జాప్యం జరిగిందన్నారు. ప్రతి నియోజకవర్గంలో మినీ పారిశ్రామిక వాడలను ఏర్పాటు చేస్తామన్నారు. కల్తీకల్లుపై ప్రజలకు అవగాహన కల్పించేందుకు ప్రచార కార్యక్రమాలను నిర్వహిస్తామన్నారు.

కాకినాడ: పరీక్షా కేంద్రంలో చూచిరాతను అడ్డుకోవడం అన్యాయమంటూ విద్యార్థులు ఆందోళనకు దిగారు. తూర్పు గోదావరి జిల్లా తునిలో పదో తరగతి ఓపెన్ స్కూల్ పరీక్షల సందర్భంగా బుధవారం ఈ ఘటన జరిగింది. పరీక్షా కేంద్రంలో కొందరు విద్యార్థులు చూచికాపీ కొడుతుండగా ఇన్విజిలేటర్లు పట్టుకుని వారిని బయటకు పంపారు. దీంతో చాలామంది విద్యార్థులు పరీక్షా కేంద్రం బయట ఆందోళనకు దిగారు.