హైదరాబాద్, ఏప్రిల్ 14: అస్పృశ్యత మూలాలను ప్రశ్నించి, అసమానతల పునాదులను పెకిలించి అపూర్వ సందేశాలను భరతజాతికి అందించిన మహానుభావుడు అంబేద్కర్ అని ఎబివిపి అఖిల భారత సహ సంఘటనా కార్యదర్శి గుంతా లక్ష్మణ్ పేర్కొన్నారు. అఖిల భాతర విద్యార్ధి పరిషత్ ఆధ్వర్యంలో అంబేద్కర్ 125వ జయంతి సందర్భంగా 125 కాగడాలతో ట్యాంక్‌బండ్‌పై ప్రదర్శన చేసి నేతలు ఘనంగా నివాళులు అర్పించారు.

హైదరాబాద్, ఏప్రిల్ 14: సర్వమానవాళికి శ్రీరాముడు ఆదర్శప్రాయుడని ఆంధ్రప్రదేశ్ ముఖ్యమంత్రి ఎన్ చంద్రబాబునాయుడు పేర్కొన్నారు. దేశ విదేశాల్లో ఉన్న తెలుగు ప్రజలు అందరికీ ఆయన శ్రీరామ నవమి శుభాకాంక్షలు తెలిపారు. తెలుగుదేశం పార్టీ ఎపి అధ్యక్షుడు కిమిడి కళావెంకటరావు, తెలంగాణ అధ్యక్షుడు ఎల్ రమణతో పాటు జాతీయ ప్రధానకార్యదర్శి లోకేష్‌బాబు, సినీనటుడు ఎన్ బాలకృష్ణ తదితరులు శ్రీరామనవమి శుభాకాంక్షలు తెలిపారు.

హైదరాబాద్, ఏప్రిల్ 14: గుంటూరు జిల్లాలో రెండు దేవాలయాలను, ఇతర ఆరు దేవాలయాలతో కలిపి ఒక గ్రూపుగా వర్గీకరిస్తూ ఆంధ్రప్రదేశ్ దేవాదాయ శాఖ తీసుకున్న నిర్ణయం చెల్లదని హైకోర్టు సంచలన తీర్పు ఇచ్చింది. ఈ వివాదానికి సంబంధించిన కేసు గత రెండు దశాబ్ధాలకు పైగా హైకోర్టులో నడుస్తోంది.

కర్నూలు: క్రికెట్ మ్యాచ్‌లపై బెట్టింగ్‌లు వేసి అప్పుల పాలైన ఓ యువకుడు ఉరి వేసుకుని ఆత్మహత్య చేసుకున్నాడు. పత్తికొండలో ఈ దారుణం గురువారం చోటుచేసుకుంది. సెల్‌ఫోన్ దుకాణం నడుపుతున్న మధు అనే యువకుడు క్రికెట్ మ్యాచ్‌లపై స్నేహితులతో బెట్టింగ్‌లు వేస్తూ భారీగా అప్పులు చేశాడు. బుధవారం జరిగిన ఐపిఎల్ మ్యాచ్ సందర్భంగా మధు వేసిన బెట్టింగ్ అంచనాలు తారుమారయ్యాయి.