హైదరాబాద్ : ఓ వివాహిత మహిళను వేధించనట్లు తన కుమారుడిపై అభియోగాలు రుజువైతే అతను చట్టప్రకారం శిక్షకు అర్హుడేనని మంత్రి రావెల కిశోర్‌బాబు అన్నారు. ఆయన మంగళవారం శాసనసభలో మాట్లాడుతూ, పోలీసులు కేసు నమోదు చేశాక తానే స్వయంగా సుశీల్‌ను తీసుకువెళ్లి బంజారాహిల్స్ పోలీసులకు అప్పగించానన్నారు. ఈ కేసును విపక్షనేత జగన్ అసెంబ్లీలో ప్రస్తావించడంతో తాను ఈ వివరణ ఇస్తున్నానని మంత్రి చెప్పారు.

విశాఖ: వైఎస్‌ఆర్ కాంగ్రెస్ మహిళా నేత పీలా వెంకటలక్ష్మి మంగళవారం ఆత్మహత్యకు యత్నించినట్లు సమాచారం. నర్సీపట్నంలోని తన ఇంట్లో ఆమె అపస్మారకంగా పడి ఉండటాన్ని గమనించి కుటుంబ సభ్యులు వెంటనే ఆస్పత్రికి తరలించారు. ఆమె ఎందుకు ఆత్మహత్యకు యత్నించారన్న విషయమై సమాచారం అందాల్సి ఉంది.

తిరుపతి: ఇక్కడి కపిలతీర్థంలో కపిలేశ్వర స్వామి బ్రహ్మోత్సవంలో తొమ్మిదో రోజు మంగళవారం స్వామివారిని పూలమాలలతో అలంకరించి పురవీధుల్లో ఊరేగించారు. పెద్ద సంఖ్యలో భక్తులు కపిలేశ్వర స్వామి, అమ్మవార్లను దర్శించుకొని కర్పూర హారతులిచ్చారు. ఈ రోజు సాయంత్రం స్వామివారికి కళ్యాణోత్సవం నిర్వహిస్తారు.

సూళ్లూరుపేట: నెల్లూరు జిల్లా శ్రీహరికోటలోని భారత అంతరిక్ష ప్రయోగ కేంద్రం సతీష్ థవన్ స్పేస్ సెంటర్ (షార్)కేంద్రం నుండి ఈ నెల 10న చేపట్టబోయే పిఎస్‌ఎల్‌వి-సి 32 రాకెట్ ప్రయోగ రిహార్సల్‌ను సోమవారం షార్‌లో విజయవంతంగా నిర్వహించారు. ప్రయోగానికి సంబంధించిన మిషన్ రెడీనెష్ రివ్యూ (ఎంఆర్‌ఆర్) సమావేశం డాక్టర్ సురేష్ అధ్యక్షతన షార్‌లోని బ్రహ్మప్రకాష్‌లో నిర్వహించారు.