విజయవాడ: ఇక్కడి గుణదలలోని సాంఘిక సంక్షేమశాఖ బాలికల హాస్టల్‌లో సోమవారం ఉదయం కలుషిత ఆహారం కారణంగా 15 మంది విద్యార్థినులు అస్వస్థతకు లోనయ్యారు. వాంతులు చేసుకుంటున్న వీరిని వెంటనే స్థానిక ప్రభుత్వ ఆస్పత్రికి తరలించారు.

విజయవాడ: శివరాత్రి పర్వదినం సందర్భంగా సోమవారం ఉదయం కృష్ణానదిలో పుణ్యస్నానాలు ఆచరించేందుకు నీటిలో దిగిన ముగ్గురు యువకుల్లో ఇద్దరు మరణించిన ఘటన అవనిగడ్డ మండలంలో జరిగింది. పాతయడ్లంక వద్ద కృష్ణానదిలో మనోజ్‌కుమార్, వెంకటరమణ, సాయి శ్రీనివాస్ స్నానం చేసేందుకు వెళ్లారు. నీటిలో కొట్టుకుపోయిన మనోజ్, వెంకటరమణ మరణించగా, సాయి శ్రీనివాస్ క్షేమంగా ఒడ్డుకు చేరుకున్నాడు.

విశాఖ: పదో తరగతి పరీక్షలు ప్రారంభం కానున్న దృష్ట్యా విద్యార్థులకు ఎలాంటి ఇబ్బందులు లేకుండా తగు చర్యలు తీసుకోవాలని ఎపి విద్యాశాఖామంత్రి గంటా శ్రీనివాసరావు అధికారులను ఆదేశించారు. ఆయన సోమవారం ఉదయం ఇక్కడి కలెక్టర్ కార్యాలయం నుంచి రాష్ట్రంలోని విద్యాశాఖ అధికారులతో వీడియో కాన్ఫరెన్స్ నిర్వహించారు. పరీక్షలు రాసే వారికి అవసరమైన సౌకర్యాలు కల్పించాలన్నారు.

గుంటూరు: కోటప్పకొండ ప్రాంతాన్ని దేశంలోనే ప్రముఖ పర్యాటక కేంద్రంగా తీర్చిదిద్దుతామని ఎ.పి. అసెంబ్లీ స్పీకర్ కోడెల శివప్రసాదరావు అన్నారు. శివరాత్రి సందర్భంగా కోటప్పకొండలో జరిగే జాతర ఏర్పాట్లను సోమవారం ఉదయం ఆయన పరిశీలించారు.