ముంబయి, మే 11: ప్రైవేట్‌రంగ బ్యాంకింగ్ సంస్థ కొటక్ మహీంద్ర బ్యాంక్ నికర లాభం గత ఆర్థిక సంవత్సరం (2015-16) చివరి త్రైమాసికం, ఈ ఏడాది జనవరి-మార్చిలో గతంతో పోల్చితే 15.62 శాతం పెరిగి 1,055.23 కోట్ల రూపాయలుగా నమోదైంది. అంతకుముందు ఆర్థిక సంవత్సరం (2014-15) జనవరి-మార్చిలో ఇది 912.60 కోట్ల రూపాయలుగా ఉంది. ఈ మేరకు బుధవారం బ్యాంక్ స్పష్టం చేసింది.

హైదరాబాద్, మే 10: కాలుష్యం వెదజల్లే రసాయన ఔషధ పరిశ్రమలతో పర్యావరణానికి ముప్పు వాటిల్లుతుండడంతో ఆ పరిశ్రమలను మూసి వేసేందుకు కేంద్ర కాలుష్య నియంత్రణ మండలి (సిపిసిబి) సిద్ధమైంది. ఈ మేరకు సిపిసిబి దేశవ్యాప్తంగా ఉన్న సుమారు 450 రసాయన ఫార్మా కంపెనీల యాజమాన్యాలకు షోకాజు నోటీసులు జారీ చేసింది. ఇందులో భాగంగానే ఆంధ్రప్రదేశ్, తెలంగాణ రాష్ట్రాల్లోని 28 ఫార్మా కంపెనీలను మూసి వేయాలంటూ నోటీసులు జారీ అయ్యాయి.

విశాఖపట్నం, మే 10: విద్యుత్ ఆదా, కాలుష్య నియంత్రణకు దోహదపడే సోలార్ పంపుసెట్ల వాడకంలో విజయనగరం జిల్లా ఆంధ్ర రాష్ట్రంలో దూసుకెళ్తోందని ఈస్ట్రన్ పవర్ డిస్ట్రిబ్యూషన్ కంపెనీ (ఈపిడిసిఎల్) చైర్మన్, మేనేజింగ్ డైరెక్టర్ రేవు ముత్యాలరాజు తెలిపారు. విజయనగరం జిల్లా పూసపాటిరేగ మండలం రెల్లివలస, కుమిలి గ్రామాల్లోని వ్యవసాయ క్షేత్రాల్లో ఏర్పాటు చేసిన సోలార్ పంపుసెట్లను మంగళవారం ఆయన పరిశీలించారు.

బెంగళూరు, మే 10: ఆన్‌లైన్ క్లాసిఫైడ్స్ సంస్థ క్వికర్.. బ్యూటీ సర్వీసెస్ ప్రొవైడర్ సలోసాను హస్తగతం చేసుకుంది. ఈ మేరకు మంగళవారం క్వికర్ తెలియజేసింది. హోమ్ సర్వీసెస్ విభాగంలో 250 కోట్ల రూపాయలను పెట్టుబడిగా పెట్టాలన్న ప్రణాళికలో భాగంగానే సలోసా వ్యూహాత్మక కొనుగోలు అని క్వికర్ తెలిపింది. తాజా పెట్టుబడులు క్వికర్ సేవలను మరింత విస్తృతపరచగలవన్న విశ్వాసాన్ని ఓ ప్రకటనలో ఆ సంస్థ వ్యక్తం చేసింది.