స్ర్తిలకు ఎక్కువ సహన శక్తి ఉన్నట్టే వివేకం పాళ్లుఎక్కువే ఉంటుంది. సమస్య ఏదైనా రాగానే చాలా ఆలోచిస్తున్నాననుకొని చాలామంది పురుషులు సిగెరెట్స్ తాగేస్తుంటారు. మరికొందరు మద్యపానం పుచ్చుకుంటూ ఉంటారు. ఇన్ని చేసినా సమస్యకు పరిష్కారం మాత్రం ఏచేద్దాం అంటూ తమ తమ భార్యల దగ్గరే వస్తారని సర్వేలు తెలుపుతున్నాయ.

‘‘ముదితల్ నేర్వగలిగిన విద్య కలదే ముద్దార నేర్పించినన్’’ అన్న కవి నానుడిని అనుసరించి, మహిళలు అన్నిరంగములలోను తమవైన ప్రతిభను చాటుతున్నారు. రక్షణ, నేవీ త్రివిధ దళాలలో సైతం మహిళ లే ముందుంటున్నారు. మహిళే మహాలక్ష్మి. లక్ష్మీ అనగా సంపద, బంగారము అని అనుకొంటారు కాని మంగళకరమైన వస్తువులన్నీ కూడా లక్ష్మీ స్వరూపాలే. లక్ష్మీ కళలే.

మనస్సానందానికి డబ్బు అవసరం లేదు. మన చుట్టూ ఉండే మనుషుల మధ్య ఉండే ప్రేమానురాగాలు, మమతానుబంధాలు హేతువులు. ఇవి కావాలంటే కొనుక్కోవడానికి దొరకవు. కానీ మన చేతుల్లోనే చేతల్లోనే పుష్కలంగా లభ్యం అవుతాయి. ముందు మనం ఆనందమార్గాలను మనచేతుల్తో పట్టుకోవాలి. మనతో కలసి జీవించేవారిలో ఎన్ని లోపాలున్నా వాటిని మంచి మనసుతో అర్థం చేసుకోవాలి. అవి దుర్గణాలైతే వాటిని ప్రేమతో వారి నుంచి దూరం చేయగలగాలి.

ఆధునిక జీవితం యాంత్రికమే కాదు- ఆందోళనలమయం కూడా! అభద్రతలూ, ఆత్మన్యూనతలూ, ప్రేమ రాహిత్యాలు, భేషజాలకు పోయి స్వయంకృతంగా పెంచుకుంటున్న అప్పుల బాధలూ, వృత్తిపరంగా వెంటబెట్టే డెడ్‌లైన్లు - టార్గెట్లు- వగైరాది దైనందిన సమస్యలు నేటి ఆధునిక జీవన చిత్రాన్ని ఛిద్రం చేస్తున్న అంశాలు. సంపాదనలు పెరిగాయి- సంపదలు పెరిగాయి- కానీ కంటినిండా నిద్ర కరువై తగిన విశ్రాంతి తద్వారా చేకూరే మనశ్శాంతి మృగ్యమైపోతోంది.