న్యూఢిల్లీ, జూన్ 3: వచ్చే నెల 1నుంచి వస్తు సేవల పన్ను(జిఎస్‌టి)ని అమలు చేసేందుకు కేంద్ర ప్రభుత్వం సిద్ధమవుతోంది. ఇందులో భాగంగా ఇప్పటివరకు పన్ను రేట్లు నిర్ణయించని బంగారం లాంటి కొన్ని వస్తువులపై పన్నును నిర్ణయించడం కోసం జిఎస్‌టి కౌన్సిల్ శనివారం ఇక్కడ సమావేశం అయింది. ఆర్థిక మంత్రి అరుణ్ జైట్లీ అధ్యక్షతన ఈ సమావేశం జరిగింది.

చెన్నై, జూన్ 3: రెండాకుల గుర్తు కోసం ఎన్నికల కమిషన్‌కు లంచం ఇవ్వజూపారన్న ఆరోపణపై దాదాపు నెల రోజులు జైల్లో గడిపిన అనంతరం బెయిలుపై విడుదలయిన అన్నాడిఎంకె ఉప ప్రధాన కార్యదర్శి టిటివి దినకరన్ ఈ కేసులో తన నిర్దోషిత్వాన్ని నిరూపించుకుంటానని చెప్పారు. ఢిల్లీలోని తీహార్ జైలునుంచి విడుదలయిన అనంతరం శనివారం ఇక్కడికి చేరుకున్న దినకరన్‌కు ఆయన అభిమానులు ఘనంగా స్వాగతం పలికారు.

లక్నో, జూన్ 3: రాష్ట్రంలో తాను పర్యటించేటప్పుడు ప్రత్యేక ఏర్పాట్లు చేయవద్దని ఉత్తరప్రదేశ్ ముఖ్యమంత్రి యోగి ఆదిత్యనాథ్ అధికారులను ఆదేశించారు. ఆయన ఎక్కడికెళ్లినా అధికారులు నానాఆర్భాటాలు, ప్రత్యేక ఏర్పాట్లు చేస్తుండడంతో వాటిపై యోగి తీవ్రంగా మండిపడ్డారు. ప్రజలను గౌరవించినప్పుడే ముఖ్యమంత్రికి గౌరవమని ఆయన స్పష్టం చేశారు.

న్యూఢిల్లీ, జూన్ 3: భారతదేశం ప్రపంచంలోనే అత్యధిక ముస్లిం జనాభా ఉన్న రెండో దేశం అయినప్పటికీ అంతర్జాతీయ ఉగ్రవాద సంస్థ ఐఎస్ మన దేశంలో కాలు మోపలేకపోయిందని కేంద్ర హోం మంత్రి రాజ్‌నాథ్ సింగ్ చెప్పారు.