హైదరాబాద్: రైతుల నుంచి నేరుగా భూమి కొనుగోలుకు తెలంగాణ ప్రభుత్వం తీసుకువచ్చిన జీవో నెం.123, 124ను బుధవారం హైకోర్టు కొట్టేసింది. జహీరాబాద్ వ్యవసాయ కూలీలు ఈ జీవోలకు వ్యతిరేకంగా హైకోర్టులో పిటిషన్ దాఖలు చేశారు. రైతులతోపాటు కూలీలకు పరిహారం ఇవ్వాలనే నిబంధనను ప్రభుత్వం విస్మరించిందని హైకోర్టు పేర్కొంది.

హైదరాబాద్‌ : కృష్ణా పుష్కరాలకు 12 రోజుల పాటు ప్రతిరోజూ 200 పైగా ప్రత్యేక బస్సులు నడపనున్నట్టు తెలంగాణ ఆర్టీసీ అధికారులు తెలిపారు. తెలంగాణలో మహబూబ్‌నగర్‌, నల్గొండ జిల్లాలు, ఏపీలో శ్రీశైలం, విజయవాడ ప్రాంతాలకు మహత్మాగాంధీ బస్‌స్టేషన్‌ నుంచి పుష్కరఘాట్లకు ప్రత్యేక బస్సులు నడపనున్నట్టు తెలిపారు. 50 మంది ప్రయాణికులు ఒకేసారి వెళ్లాలనుకుంటే వారి కోసం ప్రత్యేక బస్‌ సౌకర్యాన్ని కల్పిస్తున్నారు.

హైదరాబాద్: అనుమతులు లేకుండా వేసిన లే అవుట్లలో స్థలాలు, భవనాలు కొనవద్దని అధికారులు హెచ్చరించారు. శంషాబాద్ మండలం మదన్‌పల్లిలో వెలసిన అక్రమ వెంచర్లపై అధికారులు బుధవారం దాడులు చేశారు. అక్రమ నిర్మాణాలను తొలగించారు. అనుమతులు లేని వెంచర్లలో పెట్టుబడులు పెట్టి మోసపోరాదని వారు ప్రజలను హెచ్చరిస్తున్నారు.

హైదరాబాద్: నగరంలోని తార్నాకలో ఆర్టీసీ ఆస్పత్రిని ఆ సంస్థ చైర్మన్ సోమారపు సత్యనారాయణ బుధవారం తనిఖీ చేసి రోగులతో మాట్లాడారు. వైద్యసేవలు, సౌకర్యాల తీరుపై వివరాలు అడిగి తెలుసుకున్నారు. ఆస్పత్రి ఆవరణలో మొక్కలు నాటే కార్యక్రమాన్ని ఆయన ప్రారంభించారు. రోగులకు మెరుగైన సేవలందించాలని వైద్యులకు సూచించారు.