కాకినాడ: సూరంపాలెంలోని ఓ ప్రైవేటు ఇంజినీరింగ్ కళాశాలలో రేణుకా గాయత్రి అనే విద్యార్థిని బుధవారం ఉదయం పురుగుమందు తాగి ఆత్మహత్యకు యత్నించింది. వెంటనే ఆమెను సహచర విద్యార్థినులు గుర్తించి పిఠాపురం ప్రభుత్వ ఆస్పత్రికి తరలించారు. ప్రేమ వ్యవహారం వల్లే ఆమె ఆత్మహత్యకు యత్నించిందన్న వార్తలు వినిపిస్తున్నాయి. అయితే, ఏ విషయాన్ని చెప్పేందుకు విద్యార్థినులు సుముఖత చూపడం లేదు.

విజయవాడ: ఎపికి ప్రత్యేక హోదా కోసం పార్లమెంటులో జరుగుతున్న ఆందోళనపై టిడిపి అధినేత, సిఎం చంద్రబాబు బుధవారం తన పార్టీ ఎంపీలతో టెలికాన్ఫరెన్స్ నిర్వహించారు. స్పష్టమైన హామీ వచ్చేంత వరకూ ఆందోళనను పలు రూపాల్లో కొనసాగించాలని ఆయన సూచించారు. కేంద్రం స్పందనపై తమ భవిష్యత్ కార్యాచరణ ఆధారపడి ఉంటుందని స్పష్టం చేశారు.

విజయవాడ: ఎపికి ప్రత్యేక హోదాను సాధించడంలో కేంద్రమంత్రి సుజనా చౌదరి విఫలమయ్యారని ఆరోపిస్తూ ఆయన స్వగ్రామమైన వీరులపాడు మండలం పొన్నవరంలో బుధవారం ఉదయం కాంగ్రెస్ కార్యకర్తలు ఆందోళన చేపట్టారు. సుజనా ఇంటి ముందు రోడ్డును చీపుర్లతో ఊడ్చి వారు తమ నిరసన తెలిపారు. మంత్రి పదవిని కాపాడుకునేందుకు సుజనాచౌదరి బిజెపితో కుమ్మక్కయ్యారని కాంగ్రెస్ కార్యకర్తలు నినాదాలు చేశారు.

విజయవాడ: రేపు మధ్యాహ్నం ఏపీ సీఎం చంద్రబాబు ఢిల్లీ బయల్దేరనున్నారు. ప్రత్యేక హోదా విషయంపై ప్రధాని నరేంద్ర మోదీతో ప్రత్యేకంగా భేటీ అవుతారని సమాచారం. రాష్ట్రపతి, కేంద్రమంత్రులు, సుప్రీంకోర్టు చీఫ్‌ జస్టిస్‌‌ను పుష్కరాలకు ఆహ్వానించనున్నారు.