న్యూఢిల్లీ, జూలై 27: దేశీయ ఆటో రంగ దిగ్గజం మారుతి సుజుకి నికర లాభం ప్రస్తుత ఆర్థిక సంవత్సరం (2017-18) ప్రథమ త్రైమాసికం (ఏప్రిల్-జూన్)లో గతంతో పోల్చితే 4 శాతానికిపైగా పుంజుకుని 1,556.4 కోట్ల రూపాయలుగా నమోదైంది. గత ఆర్థిక సంవత్సరం (2016-17) ఏప్రిల్-జూన్‌లో సంస్థ లాభం 1,490.9 కోట్ల రూపాయలుగా ఉందని మారుతి సుజుకి ఇండియా (ఎమ్‌ఎస్‌ఐ) గురువారం విడుదల చేసిన ఓ ప్రకటనలో స్పష్టం చేసింది.

ముంబయి, జూలై 27: బుధవారం ముగింపుతో చూస్తే దేశీయ స్టాక్ మార్కెట్లు గురువారం యథాతథంగానే ఉన్నాయి. బాంబే స్టాక్ ఎక్స్‌చేంజ్ సూచీ సెనె్సక్స్ స్వల్పంగా 0.84 పాయింట్లు పెరిగి 32,383.30 వద్ద స్థిరపడగా, నేషనల్ స్టాక్ ఎక్స్‌చేంజ్ సూచీ నిఫ్టీ 0.10 పాయింట్లు పడిపోయి 10,020.55 వద్ద నిలిచింది. ఇంట్రా-డే ట్రేడింగ్‌లో సెనె్సక్స్ 32,672.66 పాయింట్లను తాకగా, నిఫ్టీ 10,114.85 పాయింట్ల స్థాయిని అందుకుంది.

హైదరాబాద్, జూలై 27: హైదరాబాద్ నగర కేంద్రంగా పనిచేస్తున్న పెగా సిస్టమ్స్ తన కార్యాలయాన్ని పెద్దఎత్తున విస్తరించింది. ప్రశాంత వాతావరణంలో సిబ్బంది పని చేసేందుకు, పని బృందాలు ఒకటిగా పని చేసేందుకు వీలుగా విశాలమైన కొత్త అంతస్తును తయారు చేసింది. హైటెక్ సిటీలోని రహేజా మైండ్ స్పేస్ ఐటి పార్క్‌లోని 11వ అంతస్తులో కార్యాలయాన్ని విస్తరించినట్లు కంపెనీ ప్రకటించింది.

న్యూఢిల్లీ, జూలై 27: దేశీయ ప్రముఖ ప్రైవేట్ రంగ టెలికాం ఆపరేటర్ ఐడియా సెల్యులార్ ప్రస్తుత ఆర్థిక సంవత్సరం (2017-18) ప్రథమ త్రైమాసికం (ఏప్రిల్-జూన్)లో 815.9 కోట్ల రూపాయల నష్టాన్ని చవిచూసింది. గత ఆర్థిక సంవత్సరం (2016-17) ఏప్రిల్-జూన్‌లో 217.1 కోట్ల రూపాయల లాభాన్ని ఐడియా అందుకుంది. ఆదాయం కూడా ఈసారి దాదాపు 14 శాతం క్షీణించి 8,181.7 కోట్ల రూపాయలకు పరిమితమైంది.