ఎన్నికల ప్రచారంలో రాజకీయ నాయకుల అబద్ధాలకు అంతులేకుండా పోతోంది. ఆచరణయోగ్యం కాని అర్థంపర్థం లేని హామీలు ఇవ్వడం, పథకాలు అమలు చేస్తామని చెప్పటం, ప్రత్యర్థులపై ఇష్టం వచ్చినట్లు నిరాధార ఆరోపణలు చేస్తూ ప్రజలను మభ్యపెట్టి మాయ చేసి ఓట్లు దండుకునేందుకు ప్రయత్నించటం మామూలైపోయింది. గుజరాత్, హిమాచల్ ప్రదేశ్ అసెంబ్లీ ఎన్నికల ప్రచారంలో కూడా ఇదే ధోరణి కనిపిస్తోంది.

ప్రధానమంత్రి నరేంద్ర మోదీ, బి.జె.పి అధ్యక్షుడు అమిత్ షా గుజరాత్‌లో ఐదోసారి అధికారంలోకి వచ్చేందుకు భూమ్యాకాశాలను ఏకం చేస్తున్నారు. పెద్ద నోట్ల రద్దు, జి.ఎస్.టి అమలు, కొత్తగా తెర మీదికి వచ్చిన కులతత్వం, పటేల్ వర్గం రిజర్వేషన్ల రాజకీయం, ఆమ్ ఆద్మీ పార్టీ రాజకీయాలు, కాంగ్రెస్ ఉపాధ్యక్షుడు రాహుల్ గాంధీ పాద యాత్రలు గుజరాత్‌లో బి.జె.పి విజయావకాశాలను దెబ్బతీయవచ్చుననే మాట వినిపిస్తోంది.

ఇంతకాలం అనధికార అధ్యక్షుడుగా కొనసాగిన రాహుల్ గాంధీ ఈనెలాఖరు నుండి అధికారికంగా అధ్యక్ష పదవి చేపట్టనున్నారు. రాహుల్ గాంధీ అధ్యక్ష పదవిలో రాణించగలుగుతారా? లేదా? అనే అంశం కాంగ్రెస్ లోపల, బైటా చర్చ జరుగుతోంది. కాంగ్రెస్ చరిత్రలో మొదటిసారి అధ్యక్ష పదవి చేపడుతున్న గాంధీ కుటుంబ సభ్యుడి నాయకత్వ పటిమపై అనుమానాలు వ్యక్తమవుతున్నాయి. కాంగ్రెస్ ఉపాధ్యక్షుడిగా విఫలమైన వ్యక్తి అధ్యక్షుడిగా రాణించగలుగుతారా?

మైన్మార్ నుండి బంగ్లాదేశ్ మీదుగా మన దేశంలోకి వచ్చి పలు ప్రాంతాల్లో తిష్ఠవేసిన రొహింగ్యా ముస్లింలను పంపించివేయకూడదంటూ పశ్చిమ బెంగాల్ రాజధాని కోల్‌కతాలో గత వారం లక్షలాది మంది ముస్లిం మైనారిటీలు ఉద్యమించటం కేంద్ర ప్రభుత్వం కళ్లు తెరిపించి ఉండాలి.