న్యూఢిల్లీ, జూలై 15: షెడ్యూల్ కులాలకు చెందిన విద్యార్థుల్లో పోస్ట్‌మెట్రిక్ ఉపకారవేతనాలకు అర్హులైన వారికి సొమ్మును చెల్లించేందుకు వీలుగా గడువును పెంచినట్లు కేంద్రం ప్రకటించింది. ఈ స్కీంను ఎస్సీ విద్యార్థులు సద్వినియోగం చేసుకునే విధంగా అన్ని రాష్ట్రప్రభుత్వాలు, కేంద్రపాలిత ప్రాంతాలు విద్యా సంస్థలకు తగిన ఆదేశాలు ఇవ్వాలని కేంద్రం కోరింది. ఈ ఆదేశాలను విద్యా సంస్థ లు పాటించాలని ఆదేశించింది.

న్యూఢిల్లీ, జూలై 15: హజ్ యాత్రపై ప్రభుత్వం చేపట్టిన పలు సంస్కరణల కారణంగా ఈ ఏడాది రికార్డుస్థాయిలో హజ్‌యాత్రికులు పెరిగారని మైనారిటీ వ్యవహారాల మంత్రి ముక్తర్ అబ్బాస్ నఖ్వీ చెప్పారు. మొదటి విడతగా 410 మంది హజ్‌యాత్రికుల ప్రయాణాన్ని ఆయన ప్రారంభించారు. 12 వందల మందికిపైగా హజ్ యాత్రికులు ఢిల్లీ ఇతర ప్రాంతాల నుంచి సౌదీఅరేబియాకు శనివారం బయలుదేరారని ఆయన చెప్పారు.

మనామా, జూలై 15: బహ్రేన్ పర్యటనలో ఉన్న భారత విదేశాంగ శాఖ మంత్రి సుష్మా స్వరాజ్ ఆదివారం ఆ దేశ ప్రధాని ఖలిఫా బిన్ సల్మాన్, అల్ ఖలీఫాతో సమావేశమై, ద్వైపాక్షిక సంబంధాలపై చర్చలు జరిపారు. అనంతరం బహ్రేన్ విదేశాంగ శాఖ మంత్రి షేక్ ఖలీద్ బిన్ అహ్మద్ అల్ ఖలీఫాతో కలిసి జాయింట్ కమిషన్ సమావేశంలో పాల్గొన్నారు. 2015 డిసెంబర్‌లో భారత్, బహ్రేన్ హైజాయింట్ కమిషన్ (హెచ్‌జేసీ) మొదటి సమావేశం న్యూఢిల్లీలో జరిగింది.

న్యూఢిల్లీ, జూలై 15: పనిచేసే చోట లైంగిక వేధింపులు ఇప్పటికీ మహిళలకు నిత్యసమస్యగా మారిందని ముఖ్యంగా ఇది ప్రజలకు వినోదాన్ని అందించే చిత్రపరిశ్రమలో ఎక్కువగా ఉందని జాతీయ మహిళా కమిషన్ చైర్‌పర్సన్ రేఖాశర్మ పేర్కొన్నారు.