చెన్నై: తాను ముఖ్యమంత్రిగా ప్రమాణ స్వీకారం చేసినపుడు డిఎంకె అధినేత కరుణానిధి కుమారుడు స్టాలిన్‌ను వెనుకసీట్లో కూర్చోబెట్టి అవమానించినట్టు వచ్చిన వార్తలపై సిఎం జయలలిత స్పందించారు. స్టాలిన్ వస్తున్నారని ముందుగా సమాచారం లేనందువల్లే ఇలా జరిగిందని ఆమె మంగళవారం వివరణ ఇచ్చారు. ఇది ఉద్దేశ పూర్వకంగా చేసిన పొరపాటు కాదని, ఈ విషయమై ఇక రాద్ధాంతం అనవసరమని ఆమె స్పష్టం చేశారు.

దిల్లీ: మాజీ ఐపిఎస్ అధికారిణి కిరణ్‌బేడీ బుధవారం నాడు పుదుచ్చేరి గవర్నర్‌గా ప్రమాణ స్వీకారం చేస్తారు. కొంతకాలంగా అండమాన్, నికోబార్ గవర్నర్ అజయ్‌కుమార్ సింగ్ పుదుచ్చేరి గవర్నర్‌గా అదనపు బాధ్యతలు నిర్వహిస్తున్నారు. పుదుచ్చేరి అసెంబ్లీ ఎన్నికల్లో కాంగ్రెస్, డిఎంకె కూటమి అధికారం కైవసం చేసుకున్న తరుణంలో కిరణ్‌బేడీని అక్కడికి గవర్నర్‌గా కేంద్రం పంపడం చర్చనీయాంశమైంది.

దిల్లీ: దేశ రాజధానిలో మంచినీరు, విద్యుత్ సరఫరాలో అధికారుల నిర్లక్ష్య వైఖరికి నిరసనగా కాంగ్రెస్, బిజెపి ఆధ్వర్యంలో మహిళలు మంగళవారం ముఖ్యమంత్రి కేజ్రీవాల్ ఇంటి ముందు ఆందోళన చేపట్టారు. మంచినీటి సమస్యను పరిష్కరించాలంటూ ఖాళీ బిందెలు, కుండలతో ప్రదర్శన జరిపారు. విద్యుత్ ఓల్టేజీలో హెచ్చుతగ్గుల వల్ల టీవీలు, ఫ్రిజ్‌లు, ఇతర గృహోపకరణాలు పాడైపోతున్నాయని వారు ఆగ్రహం వ్యక్తం చేశారు.

దిల్లీ: పాకిస్తాన్‌లో తలదాచుకున్న అండర్ వరల్డ్ డాన్ దావూద్ ఇబ్రహీంను త్వరలోనే పట్టుకుని భారత్‌కు తీసుకువస్తామని కేంద్ర హోం మంత్రి రాజ్‌నాథ్ సింగ్ ధీమా వ్యక్తం చేశారు. దావూద్ నేరాలకు సంబంధించి తగిన సాక్ష్యాధారాలను ఇప్పటికే పాక్ సర్కారుకు అందజేశామని ఆయన మంగళవారం ఇక్కడ మీడియాకు తెలిపారు. మతోన్మాద తీవ్రవాద సంస్థ ‘ఇస్లామిక్ స్టేట్’ (ఐఎస్) వల్ల మన దేశానికి ముప్పు లేదన్నారు.