లక్నో, ఫిబ్రవరి 9: తన విగ్రహాల స్థాపనకు పెట్టిన ఖర్చును తిరిగి చెల్లించవచ్చని బీఎస్పీ అధినేత్రి మాయావతికి సుప్రీంకోర్టు ఇచ్చిన ఆదేశంపై బీజేపీ రాద్ధాంతం చేయడం తగదని బీఎస్పీ కోరింది. ఈ కేసులో తుది తీర్పు ఈ ఏడాది ఏప్రిల్ 2వ తేదీన సుప్రీంకోర్టు వెలువరించనుంది. కోర్టు చేసిన సూచనను గోరంతలు,కొండంతలు చేసి ప్రచారం చేయరాదని మాయావతి మీడియాను కోరారు. ఈ కేసులో తనకు న్యాయం జరుగుతుందని ఆమె చెప్పారు.

న్యూఢిల్లీ, ఫిబ్రవరి 9: కర్నాటకలో కుమారస్వామి ప్రభుత్వాన్ని కూల్చేందుకు జరుగుతున్న కుట్ర వెనక బీజేపీ జాతీయ నాయకులున్నారని కాంగ్రెస్ తీవ్ర ఆరోపణలు చేసింది. కర్నాటకలో కాంగ్రెస్-జేడీఎస్ సర్కార్‌ను అస్థిరపరచేందుకు బీజేపీ ప్రయత్నిస్తోందని విమర్శించారు. బీజేపీ రాష్ట్ర అధ్యక్షుడు బీఎస్ యెడ్యూరప్ప జేడీఎస్ ఎమ్మెల్యేతో బేరసాలకు సంబంధించి ఆడియో టేప్ బయటపడంతో కలకలం రేపింది.

న్యూఢిల్లీ: స్వైన్‌ఫ్లూతో గడగడలాడుతున్న గుజరాత్, పంజాబ్‌కు రెండు ప్రత్యేక బృందాలను పంపినట్టు కేంద్ర ఆరోగ్య మంత్రిత్వశాఖ శనివారం వెల్లడించింది. రెండు రాష్ట్రాల్లో స్వేన్‌ఫ్లూ విజృంభించింది. వైరస్‌బారిన పడి పలువురు మృతి చెందారు. పరిస్థితి దారుణంగా తయారైంది. గురువారం నాటికి గుజరాత్‌లో 1,187 స్వైన్‌ఫ్లూ కేసులు నమోదయ్యాయి. 30 మంది చనిపోయారు. అలాగే పంజాబ్‌లో 301 కేసులు నమోదయ్యాయి.

శ్రీనగర్/న్యూఢిల్లీ, ఫిబ్రవరి 9: ఉత్తరభారత దేశంలో చలిగాలు, మంచు తీవ్రత వణికిస్తోంది. జమ్మూకాశ్మీర్, హిమాచల్‌ప్రదేశ్‌లో ఉష్ణోగ్రతలు కనిష్టస్థాయికి పడిపోయాయి. శుక్రవారం రాత్రి వీచిన చలిగాలులకు మంచు గడ్డకట్టుకపోయి జనం అవస్థలు పడ్డారు. కాశ్మీర్ లోయని రహదారులన్నీ మంచుతో నిండిపోయాయి. రవాణా వ్యవస్థ చిన్నాభిన్నమైందని అధికారులు వెల్లడించారు.