హైదరాబాద్: రుణాలు, మెడికల్ సీట్లు ఇప్పిస్తామంటూ మూడు కోట్ల రూపాయలను వసూలు చేసిన అంతరాష్ట్ర ముఠాను పోలీసులు రట్టు చేశారు. వెస్ట్‌జోన్ టాస్క్ఫోర్స్ పోలీసులు సతీషన్, రాం నివాస్, హరినివాస్‌లను అరెస్టు చేసి 45 లక్షల రూపాయల నగదును స్వాధీనం చేసుకున్నారు. వీరు దాదాపు మూడు కోట్లరూపాయల వరకు వసూలు చేసి ప్రజలను చీటింగ్ చేశారని పోలీసులు వెల్లడించారు.

హైదరాబాద్: అవినీతి నిరోధక శాఖకు మరో అధికారి చిక్కాడు. నీటిపారుదల కృష్ణాబేసిన్ చీఫ్ ఇంజినీర్ సురేశ్ ఇంట్లో అవినీతి నిరోధక శాఖ అధికారులు సోదాలు నిర్వహించారు. ఏకకాలంలో ఆయనకు సంబంధించిన ఇళ్లలో సోదాలు జరిపారు. ఆయనకు రెండు ఇళ్లు, పది ఫ్లాట్లు, 17 లక్షల ఫిక్సిడ్ డిపాజిట్లు, మూడు బ్యాంకు లాకర్లు ఉన్నట్లు కనుగొన్నారు.

తిరుపతి, జూలై 5: దక్షిణాయనం ప్రారంభం సందర్భంగా తిరుమల శ్రీ వేంకటేశ్వర స్వామివారి ఆలయంలో ఆణివార ఆస్థానం, కోయిల్ ఆళ్వార్ తిరుమంజనం చేస్తారు. ఈ నెల 17న కర్కాటక సంక్రమణం ఈ సందర్భంగా శ్రీవారి ఆలయంలో ఆణివార ఆస్థానం చేపడతారు. ఈ పర్వదినాన్ని పురస్కరించుకొని ముందువచ్చే మంగళవారం అంటే ఈ నెల 10న కోయిల్ ఆళ్వార్ తిరుమంజనం అత్యంత వైభవంగా టీటీడీ నిర్వహించనుంది.

న్యూఢిల్లీ, జూలై 5: మణిపూర్‌లో జరిగిన నాలుగు ఎన్‌కౌంటర్ల కేసులో తుది నివేదికను ఈ నెల 27వ తేదీలోగా సమర్పించాలని సీబీఐని సుప్రీం కోర్టు ఆదేశించింది. జవాన్లు, అస్సాం రైఫిల్స్ సిబ్బందితోపాటు పోలీసులు కూడా కలిసి బూటకపు ఎన్‌కౌంటర్లకు పాల్పడ్డారన్న ఆరోపణలపై దాఖలైన పిటిషన్‌ను విచారిస్తున్న న్యాయమూర్తులు మదన్ బీ లోకూర్, యూయూ లలిత్‌తో కూడిన సుప్రీం కోర్టు ధర్మాసనం ఈ ఉత్తర్వులు జారీ చేసింది.