హైదరాబాద్, ఏప్రిల్ 20: ఉస్మానియా యూనివర్శిటీ శతాబ్ది ఉత్సవాలకు నిజాం వారసులను నలుగుర్ని ముఖ్యమంత్రి కె చంద్రశేఖరరావు స్వయంగా ఆహ్వానించడాన్ని బిజెపి తప్పుపట్టింది. ఈయన ధోరణి చూస్తుంటే బ్రిటిష్ వారినీ పిలిచేలా ఉన్నారని బిజెపి అధికార ప్రతినిధి కృష్ణసాగరరావు ఎద్దేవా చేశారు. నిజాం వారసులను ఆహ్వానించాల్సిన అవసరం వందేళ్ల తర్వాత ఏం వచ్చిందని ఆయన నిలదీశారు.

హైదరాబాద్, ఏప్రిల్ 20: గ్రామ పంచాయితీల్లో రికార్డు స్థాయిలో పన్నులు వసూలు అయినట్టు కమిషనర్ తెలిపారు. 90శాతం వరకు పన్నులు వసూలు అయినట్టు తెలిపారు. 411.10 కోట్ల రూపాయల పన్నులు వసూలు అయ్యాయి. ఇంటి పన్ను, ప్రకటన కర్తల నుండి రావలసిన పన్నులు, వ్యవసాయ ఉత్పత్తులపై వచ్చే పన్నులు, నీటి పన్నులు, వర్తక లైసెన్స్‌ల పన్ను మొత్తం 462.49 కోట్ల రూపాయలని అంచనా వేశారు. దీనిలో 411.10 కోట్లు వసూలు అయ్యాయి.

హైదరాబాద్, ఏప్రిల్ 20: చెరకు రైతుల ఖాతాల్లోకే దాని అమ్మకం పన్నును నేరుగా బదిలీ చేయాలని రాష్ట్ర ప్రభుత్వం నిర్ణయించింది. ఈ మేరకు డైరెక్టర్ ఆఫ్ షుగర్, కేన్ కమిషనర్ భద్రు మల్లోత్ గురువారం ఒక ప్రకటన జారీ చేశారు. చెరకు అమ్మకం పన్నును దాదాపు 16 సంవత్సరాల నుండి చెరకు ధరతో కలిపి ఇస్తున్నారు. టన్నుపై 60 రూపాయలుగా చెరకు అమ్మకం పన్ను ఉంటుంది. ఈ పన్ను వాస్తవంగా ప్రభుత్వ ఖజానాకు చేరాల్సి ఉంది.

వికారాబాద్, ఏప్రిల్ 20: భారతదేశంలో కష్టం చేసింది కాంగ్రెస్ అయితే లాభం పొందుతున్నది మాత్రం బిజెపి అని పార్లమెంటు ప్రతిపక్ష నాయకుడు, కేంద్ర మాజీ మంత్రి మల్లికార్జున ఖర్గే అన్నారు. గురువారం వికారాబాద్ జిల్లా తాండూర్ పట్టణంలోని ప్రభుత్వ జూనియర్ కళాశాల మైదానంలో అంబేద్కర్ జయంతి సందర్భంగా బడుగు, బలహీన వర్గాల గర్జన సభకు ఆయన ముఖ్య అతిథిగా హాజరయ్యారు.