హైదరాబాద్ : తెలుగుదేశం పార్టీ సీనియర్ నాయకుడు, ఢిల్లీలో ఆంధ్రప్రదేశ్ ప్రభుత్వ ప్రత్యేక ప్రతినిధి కంభంపాటి రామ్మెహనరావు జూబ్లీహిల్స్ ప్రాంతంలో అక్రమంగా కట్టిన కట్టడాన్ని జీహెచ్ఎంసీ అధికారులు సోమవారం కూల్చేశారు. తన ఇంటి ముందు భాగంలో రోడ్డుమీద అక్రమంగా కంభంపాటి నిర్మాణం చేస్తున్న విషయాన్ని స్పందించిన జీహెచ్ఎంసీ అధికారులు కూల్చేశారు.

హైదరాబాద్: న్యాయాధికారులను తెలంగాణ న్యాయవాదులు అడ్డుకోవడంతో రాజేంద్రనగర్ వద్ద ఉప్పర్‌పల్లి కోర్టులో సోమవారం ఉదయం ఉద్రిక్త పరిస్థితి ఏర్పడింది. హైకోర్టును విభజించాలని, ఆంధ్రా జడ్జీలకు ఆప్షన్లను రద్దు చేయాలని ఉద్యమిస్తున్న తెలంగాణ లాయర్లు నేడు ఆందోళనను తీవ్రతరం చేశారు. న్యాయాధికారులను కోర్టుహాలులోకి వెళ్లకుండా లాయర్లు అడ్డుతగలడంతో పోలీసులు రంగ ప్రవేశం చేశారు.

సికిందరాబాద్: స్వల్ప తగాదా ఫలితంగా ఆగ్రహంతో ఊగిపోయిన ఓ వ్యక్తి మహిళపై పెట్రోలు పోసి నిప్పటించిన ఘటన సికిందరాబాద్ తుకారాం గేట్ ప్రాంతంలో సోమవారం ఉదయం జరిగింది. గొడవతో ఉన్మాదిలా మారిపోయిన మహేష్ అనే వ్యక్తి చంద్రకళపై పెట్రోలు చల్లి నిప్పంటించాడు. తీవ్రంగా గాయపడిన ఆమెను స్థానికులు వెంటనే గాంధీ ఆస్పత్రిలో చేర్పించారు. నిందితుడిని అరెస్టు చేసి పోలీసులు వివరాలు సేకరిస్తున్నారు.

హైదరాబాద్, జులై 3: కొత్తగా ఏర్పాటు చేయాలనుకుంటున్న జిల్లాల్లో తెలంగాణ ఉద్యమ స్పూర్తి ప్రదాతలు, పోరాట యోధులైన దొడ్డి కొమరయ్య, కొమరం భీం పేర్లు పెట్టాలని బిజెపి జాతీయ నాయకుడు, కేంద్ర కార్మిక, ఉపాధి కల్పనా శాఖ మంత్రి బండారు దత్తాత్రేయ రాష్ట్ర ప్రభుత్వానికి సూచించారు. దొడ్డి కొమరయ్య 70వ వర్ధంతి సందర్భంగా రచయిత, జర్నలిస్టు మరిపాల శ్రీనివాస్ రాసిన పుస్తకాన్ని కేంద్ర మంత్రి దత్తాత్రేయ ఆవిష్కరించారు.