హైదరాబాద్, ఏప్రిల్ 5: దీర్ఘకాలిక సమస్యలు వెంటనే పరిష్కరించాలని కోరుతూ లారీ యజమానుల సంఘాల ఆధ్వర్యంలో చేపట్టిన సమ్మె బుధవారంతో ఏడో రోజుకు చేరుకుంది. సమ్మెతో రవాణా వ్యవస్థ స్తంభించిపోయింది. ఇప్పటి వరకు దక్షిణాది రాష్ట్రాల్లోనే కొనసాగుతున్న సమ్మె ఈనెల 8 నుంచి దేశవ్యాప్తంగా ఆలిండియా మోటార్ ట్రాన్స్‌పోర్టు కాంస్ సమ్మెను చేపట్టనుంది. ఎక్కడి లారీలు అక్కడే నిలిచిపోగా మార్కెట్ యార్డులు బోసి పోతున్నాయి.

విజయవాడ, ఏప్రిల్ 5: వెలగపూడి సచివాలయంలో ఈ నెల 6న ముగ్గురు మంత్రులు బాధ్యతలు స్వీకరించనున్నారు. వెలగపూడి సచివాలయం బ్లాక్-4లో వ్యవసాయ శాఖ మంత్రి సోమిరెడ్డి చంద్రమోహనరెడ్డి ఉదయం 9.30 గంటలకు బాధ్యతలు స్వీకరిస్తారు. సమాచార, పౌర సంబంధాల శాఖ మంత్రి కాల్వ శ్రీనివాసులు కూడా బ్లాక్-4లో బాధ్యతలు స్వీకరిస్తారు. అనంతరం ఉదయం 8.30 గంటలకు పబ్లిసిటీ సెల్‌ను ప్రారంభిస్తారు.

విజయనగరం, ఏప్రిల్ 5: రాష్ట్రంలో ప్రసిద్ధ పుణ్యక్షేత్రమైన రామతీర్థంలో శ్రీ సీతారాముల కల్యాణ వేడుక కన్నుల పండువగా జరిగింది. నెల్లిమర్ల మండలం రామతీర్థం క్షేత్రంలో శ్రీ సీతారాముల కల్యాణోత్సవాన్ని తిలకించేందుకు పెద్ద సంఖ్యలో భక్తులు విచ్చేసారు. విష్వక్సేన పూజ, పుణ్యహవాచనం అనంతరం కల్యాణ ఘట్టం ప్రారంభమైంది. సుందరంగా తీర్చిదిద్దిన కల్యాణ వేదికపై జలకలశానికి అర్చకులు ప్రత్యేక పూజలు నిర్వహించారు.

ఏలూరు, ఏప్రిల్ 5: పశ్చిమ గోదావరి జిల్లా కేంద్రం ఏలూరులోని జిల్లా జైలులో రిమాండ్‌లో ఉన్న అగ్రిగోల్డ్ సంస్థ ఇద్దరు డైరెక్టర్లను విచారణ నిమిత్తం సిఐడి కస్టడీకి ఇస్తూ ఏలూరులోని జిల్లా కోర్టు బుధవారం ఆదేశాలు జారీచేసింది. రాష్ట్రంలోనే తొలిసారిగా జిల్లాలోని పెదపాడు పోలీసుస్టేషన్‌లో ఈ సంస్థపై కేసు నమోదు కావడం తెలిసిందే.