విజయవాడ: ఏపిలో పెంచిన విద్యుత్ చార్జీలు శుక్రవారం నుంచి అమలులోకి వస్తాయి. కొత్త చార్జీలను గురువారం ఇక్కడ ఎపిఈఆర్‌సి చైర్మన్ భవానీ ప్రసాద్ విడుదల చేశారు. పెంచిన చార్జీల వల్ల గృహవినియోగదారులపై పెద్దగా భారం పడదు. 96 శాతం మంది ప్రజలకు ఇవి ఎలాంటి భారం కావని అధికారులు తెలిపారు. ఈ ఏడాది 783 కోట్ల రూపాయల మేరకు చార్జీలను పెంచాలని ప్రతిపాదించినా ఆ మొత్తాన్ని 216 కోట్లకు తగ్గించారు.

విశాఖ: అవినీతి ఆరోపణలు రావడంతో చింతపల్లి ఎస్‌ఐ రాఘవేంద్ర రెడ్డితో పాటు ఇద్దరు కానిస్టేబుళ్లను ఉన్నతాధికారులు సస్పెండ్ చేశారు. వీరిపై సమగ్ర విచారణ జరిపేందుకు సస్పెండ్ చేసినట్లు తెలిసింది

ఏలూరు: డిపాజిట్ల పేరుతో వేల కోట్ల రూపాయలు కాజేసిన అగ్రిగోల్డ్ నిందితులను బెంగళూరుకు చెందిన సిఐడి అధికారులు అదుపులోకి తీసుకున్నారు. అగ్రిగోల్డ్ కేసుకు సంబంధించి ఏలూరు జైలులో ఉన్న ఆ సంస్థ చైర్మన్ ఎవి రామారావు, ఎండి శేషునారాయణతో పాటు మరో ముగ్గురిని కర్నాటక సిఐడి పోలీసులు కస్టడీలోకి తీసుకుని బెంగళూరుకు తీసుకువెళ్లారు.

హైదరాబాద్: ఎపి సిఎం చంద్రబాబు గురువారం ఇక్కడ కాపు కులానికి చెందిన ప్రజాప్రతినిధులతో భేటీ అయ్యారు. కాపు ఆర్థిక సహాయ సంస్థ, బిసి కమిషన్ నివేదిక తదితర విషయాలను చర్చించారు. కాపు కార్పొరేషన్ అధికారులు పాల్గొన్నారు.