హైదరాబాద్, ఏప్రిల్ 22:హైదరాబాద్‌తో పాటు కరీంనగర్, ఖమ్మం పట్టణాల్లో నిర్మించే ఐదు పెద్దాస్పత్రుల నిర్మాణానికి ఆర్థిక సహకారం అందించేందుకు నెదర్లాండ్స్‌కు చెందిన రాబో బ్యాంకు ముందుకు వచ్చింది. శ్రీలంకతో పాటు పలు ప్రాంతాల్లో పెద్దస్పత్రులు నిర్మించిన అనుభవం ఈ బ్యాంకు ఉంది. తెలంగాణలో అస్పత్రుల నిర్మాణ వ్యయంలో, నిర్మాణంలో భాగం పంచుకుంటామని రాబో ప్రతినిధులు తెలిపారు.

విజయవాడ, ఏప్రిల్ 22: ఇజ్రాయిల్ తరహాలో రాష్ట్రంలో వ్యవసాయరంగానికి అత్యధిక ప్రాధాన్యం ఇవ్వనున్నట్లు ముఖ్యమంత్రి చంద్రబాబు నాయుడు తెలిపారు. ప్లాస్టిక్‌కు మానవ జీవితంతో విడదీయరాని బంధం ఉందని, ప్రధానంగా వ్యవసాయ రంగంలో డ్రిప్, స్ప్రింక్లర్ ఇరిగేషన్ పరికరాల తయారీలో ప్లాస్టిక్‌కు తగిన ప్రాధాన్యం ఉందని అన్నారు.

న్యూఢిల్లీ, ఏప్రిల్ 22: వైకాపా ఎమ్మెల్యే రోజా సస్పెన్షన్ నిర్ణయాన్ని సుప్రీంకోర్టు శాసనసభ స్పీకర్‌కు వదిలిపెట్టింది. ఈ వివాదంపై రోజా రాసిన లేఖను పరిగణనలోకి తీసుకొని సస్పెన్షన్‌పై నిర్ణయం తీసుకోవాల్సిందిగా స్పీకర్‌కు ధర్మాసనం సూచించింది. అదే సమయంలో రోజా సస్పెన్షన్‌పై హైకోర్టు ఏకసభ్య ధర్మాసనం వద్ద విచారణలో ఉన్న పిటిషన్‌ను విచారించేందుకు సుప్రీంకోర్టు అవకాశం కల్పించింది.

గుంటూరు, ఏప్రిల్ 22: గుంటూరు జిల్లా వెలగపూడిలో నిర్మిస్తున్న తాత్కాలిక సచివాలయ భవనాలను ముందుగానే ఈ నెల 25న లాంఛనంగా ప్రారంభించాలని ప్రభుత్వం నిర్ణయించింది. జీ ప్లస్-1గా 6 లక్షల చదరపు అడుగుల్లో నిర్మిస్తున్న ఈ కార్యాలయ పనులు జూన్ 15లోగా ఎల్‌అండ్ టి, షాపూర్జీ పల్లోంజీ సంస్థలు పూర్తిచేయాల్సి ఉంది.