హైదరాబాద్: ఎపికి ప్రత్యేక హోదా ఇవ్వాలన్న డిమాండ్‌ను ముఖ్యమంత్రి చంద్రబాబు పథకం ప్రకారం నీరుగార్చారని వైకాపా అధ్యక్షుడు జగన్ ఆరోపించారు. ప్రత్యేకహోదా సంజీవని కాదని బాబు వ్యాఖ్యానించడం వల్లే కేంద్రం ఆ విషయాన్ని పట్టించుకోవడం లేదన్నారు. ఎన్నికల ముందు ఇచ్చిన హామీలను విస్మరించి, ఎపి ప్రజలతో ప్రధాని మోదీ, చంద్రబాబు చెలగాటమాడుతున్నారని విమర్శించారు.

అనంతపురం: పుట్టపర్తి అర్బన్ డెవలప్‌మెంట్ అథారిటీ వైస్ చైర్మన్ రామాంజనేయులు ఇంటిపై శనివారం ఉదయం ఎసిబి అధికారులు దాడి చేసి సుమారు 2 కోట్ల రూపాయల అక్రమాస్తులున్నట్లు గుర్తించారు. భారీగా అవినీతి ఆరోపణలు రావడంతో ఇతని ఇంటిపై నెల రోజుల వ్యవధిలో ఎసిబి అధికారులు రెండోసారి దాడులు చేశారు.

కాకినాడ: కాకినాడలో డిటిసి (డిప్యూటీ ట్రాన్స్‌పోర్టు కమిషనర్)గా పనిచేస్తూ భారీగా అక్రమార్జనకు పాల్పడిన ఆదిమూలం మోహన్‌ను ఎసిబి అధికారులు శనివారం కృష్ణాజిల్లా చల్లపల్లి జైలుకు తరలించారు. ఈరోజు ఉదయం ఆయనను విజయవాడ ఎసిబి కోర్టులో హాజరుపరచగా న్యాయమూర్తి 15రోజుల రిమాండ్ విధించారు.

తిరుపతి: ఇక్కడికి సమీపంలోని బాకరాపేట ఘాట్‌రోడ్‌లో శనివారం ఉదయం కూంబింగ్ చేస్తున్న పోలీసులపై ఎర్రచందనం కూలీలు రాళ్లదాడి చేశారు. పోలీసులు వస్తున్నట్లు పసిగట్టిన కూలీలు రాళ్లు రువ్వడం ప్రారంభించగా ఓ కానిస్టేబుల్ గాయపడ్డాడు. వెంటనే తేరుకున్న పోలీసులు గాలిలోకి కాల్పులు జరపడంతో కూలీలు పరుగుతీశారు. ఓ కూలీని అరెస్టు చేసి, 37 ఎర్రచందనం దుంగలను పోలీసులు స్వాధీనం చేసుకున్నారు.