బెంగళూరు : కర్ణాటక శాసనసభ ఎన్నికల సందర్భంగా బీజేపీ మేనిఫెస్టోను ఆ పార్టీ ముఖ్యమంత్రి అభ్యర్థి యడ్యూరప్ప శుక్రవారం ఉదయం విడుదల చేశారు. యడ్యూరప్ప మాట్లాడుతూ తాను ముఖ్యమంత్రిగా పదవీ ప్రమాణ స్వీకారం చేసిన రోజు తాను చేసే మొట్టమొదటి ప్రకటన రైతులు, నేతన్నల రుణాలు రూ.1 లక్ష వరకు రద్దు చేయడమేనన్నారు. రాష్ట్రంలో చెరువులను పునరుద్ధరించేందుకు ‘మిషన్ కల్యాణి’ని ప్రారంభిస్తామని చెప్పారు.

ఔరద్, మే 3: కర్నాటక ఎన్నికల ప్రచారంలో రోజుకో కొత్త ఒరవడి చోటుచేసుకుంటోంది. అధికార, ప్రతిపక్షాల మధ్య విమర్శలు తార స్థాయికి చేరుకున్న సంగతి తెలిసిందే. ప్రధాని నరేంద్రమోదీ, కాంగ్రెస్ అధ్యక్షుడు రాహుల్ గాంధీ మధ్య ఆరోపణలూ అదే స్థాయిలో సాగాయి. అయతే, కాంగ్రెస్ అధ్యక్షుడు రాహుల్ గాంధీ గురువారం ఇక్కడో ఎన్నికల సభలో మాట్లాడుతూ నరేంద్ర మోదీపై వ్యక్తిగత విమర్శలు చేయబోనని అకస్మాత్తుగా ప్రకటించారు.

న్యూఢిల్లీ, మే 3: అరవై ఐదవ జాతీయ చలన చిత్ర ఆవార్డుల ప్రదానోత్సవం వివాదాస్పదమైంది. రాష్టప్రతి రామ్‌నాథ్ కోవింద్ కేవలం పదకొండు ముఖ్యమైన అవార్డులు మాత్రమే బహూకరించటంతో దాదాపు డెబ్భై మంది ఇతర బహుమతి గ్రహీతలు అవార్డుల ప్రదానోత్సవ కార్యక్రమానికి గైర్హాజరయ్యారు. 1954 సంవత్సరం నుండి జరుగుతున్న జాతీయ చలన చిత్రోత్సవ కార్యక్రమాన్ని భ్రష్టుపట్టించారని పలువురు అవార్డు గ్రహీతలు ఆరోపించారు.

పాట్నా, మే 3: బిహార్‌లో గురువారం ఘోర రోడ్డు ప్రమాదం జరిగింది. మోతీహరీ ప్రాంతంలో ప్రయాణికుల బస్సు రోడ్డుపై పల్టీ కొట్టింది. వెంటనే బస్సుకు నిప్పు అంటుకుంది. దీంతో 27 మంది ప్రయాణికులు సజీవ దహనం అయ్యారు. మోతీహరీ జిల్లా చెత్వా గ్రామంలో ఈ విషాదం చోటుచేసుకుందని విపత్తుల శాఖ మంత్రి దినేష్ చంద్ర యాదవ్ వెల్లడించారు. ప్రాథమిక సమాచారం మేరకు ప్రమాదం జరిగినప్పుడు బస్సులో 42 మంది ప్రయాణికులు ఉన్నారు.