చెన్నై, నవంబర్ 29: తమిళనాడు ముఖ్యమంత్రి జయలలిత ఆరోగ్యం బాగా మెరుగైందని, త్వరలోనే డిశ్చార్జ్ అవుతారని అన్నాడిఎంకె వర్గాలు వెల్లడించాయి. అమ్మ ఆరోగ్యం మామూలు స్థితికి చేరుకుందని పార్టీ అధికార ప్రతినిధి సిఆర్ సరస్వతి మంగళవారం తెలిపారు. ‘అమ్మ చక్కగా ఆహారం తీసుకుంటున్నారు. ఫిజియోథెరపీ జరుగుతోంది. త్వరలోనే ఇంటికి వచ్చేస్తారు’ అని ఆమె స్పష్టం చేశారు.

న్యూఢిల్లీ, నవంబర్ 29: తల్లిదండ్రుల స్వార్జితమైన ఇంటిలో నివసించేందుకు పెళ్లయినా, కాకపోయినా కుమారుడికి ఎలాంటి హక్కూ లేదని, వారి దయాదాక్షిణ్యాలపై మాత్రమే అతను ఆ ఇంటిలో ఉండవచ్చని ఢిల్లీ హైకోర్టు స్పష్టం చేసింది. సుహృద్భావ సంబంధాలు కొనసాగినంతకాలం తల్లిదండ్రులు తమ కుమారుడ్ని ఇంటిలో ఉండడానికి అనుమతించినంత మాత్రాన జీవితాంతం అతని భారాన్ని వారు భరించాలని అర్థం కాదని కూడా కోర్టు స్పష్టం చేసింది.

న్యూఢిల్లీ, నవంబర్ 28: పెద్దనోట్లను రద్దు చేయటం ద్వారా ప్రధాన మంత్రి నరేంద్ర మోదీ సామాన్య ప్రజల ఉసురు పోసుకుంటున్నారని వామపక్షాలు ఆరోపించాయి. జన ఆక్రోశ్ దివస్‌లో భాగంగా సిపిఎం, సిపిఐలతో సహా ఏడు వామపక్షాల నేతలు నిరసన ప్రదర్శనలో పాల్గొన్నాయి. దేశంలో అసాధారణ ఆర్థిక సంక్షోభాన్ని మోదీ సృష్టించారని ఆ పార్టీ నేతలు ఆరోపించారు.

న్యూఢిల్లీ, నవంబర్ 28: పెద్దనోట్ల రద్దు నేపథ్యంలో తలెత్తుతున్న ఇబ్బందులను దృష్టిలో పెట్టుకుని పెన్షనర్లకు ఊరట కలిగించే నిర్ణయాన్ని ఇపిఎఫ్‌ఓ ప్రకటించింది. జనవరి 15లోగా యాభై లక్షల మంది పెన్షనర్లు తమ జీవన సర్ట్ఫికెట్‌ను సమర్పించవచ్చునంటూ వెసులుబాటు కల్పించింది. ఈ మేరకు క్షేత్రస్థాయి అధికారులకు ఆదేశాలు జారీ చేసినట్లు ఇపిఎఫ్‌ఓ అధికారి తెలిపారు.