గుంటూరు, ఆగస్టు 4: ఆంధ్రప్రదేశ్ సచివాలయానికి మరో మూడు కీలక విభాగాలను తరలించారు. ఇప్పటి వరకు ఐదు ప్రభుత్వ శాఖల కార్యాలయాలు ఏర్పాటయ్యాయి. గురువారం రెండో బ్లాక్ గ్రౌండ్ ఫ్లోర్‌లో పురపాలకశాఖ మంత్రి పి నారాయణ, మున్సిపల్ అడ్మినిస్ట్రేషన్ ముఖ్య కార్యదర్శి ఎంపి కన్నబాబు, ఉప ముఖ్యమంత్రి చినరాజప్ప, హోంశాఖ ముఖ్యకార్యదర్శి అనూరాధ తమ చాంబర్లను ప్రారంభించారు.

విశాఖపట్నం, ఆగస్టు 4: వాయవ్య బంగాళాఖాతంలో ఏర్పడిన అల్పపీడనం స్థిరంగా అక్కడే కొనసాగుతోందని విశాఖలోని తుపాను హెచ్చరికల కేంద్రం అధికారులు గురువారం రాత్రి తెలిపారు. ఉత్తర ఒడిశా నుంచి దక్షిణ తమిళనాడు వరకూ కోస్తాంధ్ర మీదుగా ఉపరితల ఆవర్తనం కూడా కొనసాగుతోంది. దీని ప్రభావంతో రానున్న 24 గంటల్లో పలు చోట్ల వర్షం కురిసే అవకాశం ఉందని తెలిపారు. ఒకటి, రెండు చోట్ల భారీ వర్షాలు కురిసే అవకాశం ఉంది.

హైదరాబాద్, ఆగస్టు 4:గనుల శాఖ ప్రక్షాళనకు ప్రభుత్వం నడుం బిగించింది. సంవత్సరాల తరబడి ఒకేచోట పాతుకుపోయిన అధికారులు, సిబ్బంది వల్ల ఇసుక అక్రమ రవాణాతోపాటు ఇతరత్రా జరుగుతున్న అక్రమాలకు చెక్ పెట్టడానికి సంబంధిత శాఖ మంత్రి కెటిఆర్ నడుం బిగించారు. ఒకేరోజు 93 మంది అధికారులను బదిలీ చేస్తూ గురువారం ఉత్తర్వులు జారీ అయ్యాయి.

విజయవాడ, ఆగస్టు 4: రాజధాని అమరావతికి సమీపంలో మరో ప్రతిష్ఠాత్మక ప్రాజెక్ట్ ఏర్పాటుకు ముందడుగు పడింది. కృష్ణా జిల్లా జగ్గయ్యపేటకు సమీపంలోని ముక్త్యాల వద్ద 310 ఎకరాల్లో ఏర్పాటవుతున్న ఇంటిగ్రేటెడ్ మెగా టౌన్‌షిప్.. అమరావతికి ప్రత్యేక ఆకర్షణ కానుంది.