హైదరాబాద్, జూలై 27: తెలంగాణ పబ్లిక్ సర్వీసు కమిషన్ (టిఎస్‌పిఎస్‌సి) గతంలో జారీ చేసిన గ్రూప్-2 నోటిఫికేషన్‌ను తాజాగా మళ్లీ జారీ చేయాలని యోచిస్తున్నట్టు తెలిసింది. గతంలో జారీ చేసిన నోటిఫికేషన్‌లో 434 పోస్టుల భర్తీ చేయనున్నట్టు టిఎస్‌పిఎస్‌సి పేర్కొంది. అయితే గ్రూప్-2 కేడర్‌కు మరో 593 పోస్టుల మంజురుకు ప్రభుత్వం ఆమోదించింది.

హైదరాబాద్: ఎంబిబిఎస్, డెంటల్ కోర్సుల్లో ప్రవేశానికి ఇటీవల జరిగిన తెలంగాణ ఎంసెట్-2 పేపర్ లీక్ అయినట్టు సిఐడి పోలీసులు నిర్ధారణకు వచ్చినట్లు సమాచారం. ఆరు బృందాలుగా ఏర్పడిన సిఐడి పోలీసులు వివిధ ప్రాంతాల్లో ఇందుకు సంబంధించి బ్రోకర్లను, విద్యార్థులను, కోచింగ్ సెంటర్ల యాజమాన్యాలను క్షుణ్ణంగా విచారించారు. ఇప్పటికే ముగ్గురు నిందితులను అదుపులోకి తీసుకోగా మరో ఇద్దరు కీలక నిందితుల కోసం గాలిస్తున్నారు.

మెదక్‌: మల్లన్నసాగర్‌ ప్రాజెక్టు నిర్మాణానికి భూములిచ్చేందుకు పల్లెపహాడ్‌ గ్రామస్థులు ముందుకొచ్చారు. గజ్వేల్‌లో పల్లెపహాడ్‌ రైతులు, గ్రామస్థులతో మంత్రి హరీశ్‌రావు, ఎమ్మెల్యే రామలింగారెడ్డి, కలెక్టర్‌ రొనాల్డ్‌రోస్‌ చర్చలు బుధవారం జరిపారు. మంత్రి హామీతో ప్రాజెక్టుకు భూములిచ్చేందుకు పల్లెపహాడ్‌ రైతులు అంగీకారం తెలిపారు.

నల్గొండ: ప్రైవేటు విద్యాసంస్థల్లో అరాచకాలను అరికట్టాలని ఎబివిపి ఆధ్వర్యంలో ర్యాలీ చేస్తున్న విద్యార్థులపై ఓ ప్రైవేటు కాలేజీ చైర్మన్ చేయి చేసుకోవడంతో హుజూర్‌నగర్‌లో బుధవారం ఉద్రిక్తత ఏర్పడింది. తమపై దాడి చేసిన కాలేజీ చైర్మన్‌పై చర్య తీసుకోవాలని విద్యార్థులు ధర్నా ప్రారంభించగా వారిపై పోలీసులు లాఠీచార్జి చేశారు.