ఏలూరు, జూలై 21 : ఎపిఎస్ ఆర్టీసీ కార్మికులు ప్రయాణీకులకు అందించే సేవలు ప్రశంసనీయమని జిల్లా ఎస్‌పి భాస్కర్ భూషణ్ అన్నారు. ఆర్‌టిసి ఆధ్వర్యంలో ఈ నెల 15వ తేదీన ప్రారంభమైన ప్రమాద రహిత వారోత్సవాలు గురువారంతో ముగిసిన నేపధ్యంలో ఆర్‌టిసి గ్యారేజ్ వద్ద జిల్లాలోని ఎనిమిది డిపోల పరిధిలో ప్రమాద రహితంగా నడిపిన ఆర్‌టిసి డ్రైవర్లకు మెమెంటోలు అందించే కార్యక్రమానికి ఆయన ముఖ్య అతిధిగా హాజరయ్యారు.

వీరవాసరం, జూలై 21: వీరవాసరం మండలంలోని మత్స్యపురిపాలెం పంచాయతీలో నరసాపురం డిఎల్‌పిఒ గోగులమండ శ్రీరాములు గురువారం విచారణ నిర్వహించారు. గ్రామపంచాయతీలో అవకతవకలు జరిగాయంటూ పంచాయతీబోర్డు ఉపసర్పంచ్, ఎంపిటిసి మరికొంతమంది చేసిన ఫిర్యాదుపై విచారణ చేపట్టారు. పంచాయతీ రికార్డులను పరిశీలించారు. పంచాయతీ కార్యదర్శి ప్రభాకరరావు రికార్డులను డిఎల్‌పిఒకు చూపించారు.

సిద్దిపేట, జూలై 22 : ఎఎన్‌ఎంల సమస్యల పరిష్కారానికి డిమాండ్ చేస్తు కళ్లకు గంతలతో శుక్రవారం నిరనస వ్యక్తం చేశారు. ప్రభుత్వానికి వ్యతిరేకంగా నినాదాలు చేశారు. ఈసందర్భంగా సిఐటియు డివిజన్ ఉపాధ్యక్షురాలు హేమలత మాట్లాడుతూ ఎఎన్‌ఎంల సమస్యల పరిష్కరించాలని గత ఐదు రోజులుగా ఆందోళన చేస్తున్న ప్రభుత్వం పట్టించుకోకపోవటం దారుణమన్నారు. ఎఎన్‌ఎంలకు 10వ పిఆర్‌సి ప్రకారం వేతనాలు చెల్లించాలని డిమాండ్ చేశారు.

తొగుట, జూలై 22: ప్రజల ఇష్టాలను పరిగణనలోకి తీసుకోకుండా ప్రభుత్వం మల్లన్నసాగర్‌పై నిరంకుశంగా వ్యవహరించడం వల్లే రైతుల ఆత్మహత్యలు చేసుకుంటున్నారని, రైతులవి ఆత్మహత్యలు కాదని, ప్రభుత్వ హత్యలేనని మాజీ మంత్రులు దామోదర్ రాజనర్సింహ, సునితా లక్ష్మారెడ్డిలు ఆరోపించారు. శుక్రవారం మండలంలోని పల్లెపహడ్‌లో మల్లన్నసాగర్ ముంపు బెంగతో ఆత్మహత్య చేసుకున్న రైతు నర్సింలు కుటుంబాన్ని పరామర్శించి ఓదార్చారు.