విశాఖపట్నం, సెప్టెంబరు 27: భారీ వర్షాలతో ఉత్తరాంధ్ర అతలాకుతలమవుతోంది. వారం రోజులుగా ఎడతెరిపిలేకుండా కురుస్తున్న వర్షాలతో విశాఖ, విజయనగరం, శ్రీకాకుళం జిల్లాల్లో జన జీవనం అస్తవ్యస్తమైంది. వాగులు, వంకలు పొంగిపొర్లుతున్నాయి. చాలా గ్రామాలకు బాహ్య ప్రపంచంతో సంబంధాలు తెగిపోయాయి. దువ్వాడ నుంచి తుని వరకూ ఉన్న రైల్వే లైన్‌పై అనేక చోట్ల వరద నీరు వచ్చి చేరడంతో రైళ్ల రాకపోకలకు అంతరాయం కలిగింది.

రాజుపాలెం, సెప్టెంబర్ 27: పిల్లనిచ్చిన మామ ఎన్‌టిఆర్‌ను వెన్నుపోటు పొడిచిన ఘనత చంద్రబాబునాయుడుదని వైఎస్‌ఆర్ కాంగ్రెస్ పార్టీ అధినేత వైఎస్ జగన్మోహనరెడ్డి అన్నారు. మంగళవారం జగన్ గుంటూరు జిల్లా రాజుపాలెం మండలంలోని కొండమోడు, అనుపాలెం, బెల్లంకొండ, రాజుపాలెం, రెడ్డిగూడెం గ్రామాల్లో వరద ముంపునకు గురైన పొలాలు, బ్రిడ్జిలు, నర్సరీలు, గృహాలను పరిశీలించారు.

తిరుమల, సెప్టెంబర్ 27: అక్టోబర్ 3నుంచి ప్రారంభం కానున్న తిరుమల శ్రీవారి బ్రహోత్సవాలను పురస్కరించుకుని శ్రీవారి ఆలయంలో మంగళవారం కోయిల్‌ఆళ్వార్ తిరుమంజనం ఘనంగా జరిగింది. ఉగాది, ఆణివార ఆస్థానం, బ్రహ్మోత్సవం, వైకుంఠ ఏకాదశి పర్వదినాల మందు వచ్చే మంగళవారం ఆలయ శుద్ధి కార్యక్రమాన్ని నిర్వహించడం ఆనవాయితీ. మంగళవారం ఉదయం 6 నుంచి 10 గంటల వరకు ఈ ఆలయ శుద్ధి కార్యక్రమాన్ని అర్చకులు ఆగమోక్తంగా నిర్వహించారు.

చిలకలూరిపేట, సెప్టెంబర్ 27: వరదలకు దెబ్బతిన్న పంట నష్టం అంచనా వేసేందుకు రాష్ట్రంలోనే మొదటిసారిగా డ్రోన్‌లను ఉపయోగిస్తున్నామని ఎపి స్టేట్ ఫైబర్ నెట్ లిమిటెడ్ ఇడి బొజ్జా కృష్ణ మంగళవారం తెలిపారు. గుంటూరు జిల్లా గంగన్నపాలెం వద్ద సుమారు 5 కిలోమీటర్ల మేర డ్రోన్‌ల ద్వారా పంటనష్టం అంచనా వేశారు.