ముంబయి, మార్చి 16: కరోనా వైరస్ భయంతో విమాన ప్రయాణాలపై అన్ని దేశాల్లోనూ ఆంక్షలు తీవ్రం కావడంతో భారత్‌లో విమాన ప్రయాణికుల సంఖ్య జూన్ వరకు 50 శాతం మేర తగ్గిపోవచ్చునని తాజాగా వెలువడిన ఓ నివేదిక స్పష్టం చేస్తోంది. రోజురోజుకూ పరిస్థితి తీవ్రం కావడంతో ప్రపంచవ్యాప్తంగా అన్ని విమానయాన సంస్థలు నష్టాల్లో మునిగిపోయాయి. ప్రయాణికుల సంఖ్య గణనీయంగా తగ్గిపోయింది.

న్యూఢిల్లీ, మార్చి 16: దేశంలో రెండు వేల రూపాయల నోట్ల మార్కెట్ నుంచి తొలగించాలన్న దానిపై ఎలాంటి నిర్ణయం తీసుకోలేదని కేంద్ర ఆర్థిక శాఖ సహాయ మంత్రి అనురాగ్ సింగ్ ఠాకూర్ సోమవారం లోక్‌సభలో ప్రకటించారు. ప్రభుత్వరంగంలోని ఎస్‌బీఐ, ఇండియన్ బ్యాంక్ 500 నోట్లు, 200 నోట్లకు వీలుగా ఏటీఎంలలో మార్పులు తీసుకువస్తున్నాయని ఆయన వెల్లడించారు. లోక్‌సభలో సభ్యులు అడిగిన ప్రశ్నలకు ఆయన లిఖితపూర్వకంగా సమాధానం చెప్పారు.

*జర్మనీలోని ఫ్రాంక్‌ఫర్ట్ విమానాశ్రయంలో నిలిచి ఉన్న లుఫ్తాన్సా ఎయిర్ క్రాఫ్ట్‌లు. కరోనా కారణంగా, ప్రయాణికుల సంఖ్య దారుణంగా పడిపోవడంతో, విమానయాన రంగం గడ్డు సమస్యను ఎదుర్కొంటున్నది. భారీగా నష్టపోయిన విమానయాన సంస్థల్లో లుఫ్తాన్సా మొదటి వరుసలో ఉంది. సోమవారం నుంచి ప్రారంభమయ్యే కొత్త వారంలోనూ పరిస్థితిలో చెప్పుకోదగ్గ మార్పు ఉండకపోవచ్చని విశే్లషకులు జోస్యం చెప్తున్నారు.

ఫ్రాన్స్‌లోని కింగెర్‌షెమ్ పట్టణంలోని ఒక రెస్ట్రాంట్ ముందు కనిపిస్తున్న నోటీసు. ప్రభుత్వ ఆదేశాల ప్రకారం రెస్ట్రాంట్‌ను నిరవధికంగా మూసేస్తున్నామని, తదుపరి ఆదేశాలు అందే వరకూ తెరవడం లేదని ఆ నోటీసు బోర్డులోని సారాంశం. కరోనా వైరస్ బాధిత ఐరోపా దేశాల్లో ఫ్రాన్స్, స్పెయిన్ కూడా చేరాయి. వైరస్ కారణంగా, అత్యవరస పరిస్థితుల్లో తప్ప బయటకు రావద్దని న్యూజిలాండ్ సర్కారు ప్రజలను కోరింది.