న్యూఢిల్లీ: ఎన్డీయే ప్రభుత్వం వచ్చిన తరువాత ఎన్ని ఉద్యోగాలు కల్పించామో వివిధ శాఖలు లెక్కలు తయారుచేయాల్సిందిగా ప్రధాని నరేంద్ర మోదీ ఆదేశించారు. 2014 ఎన్నికల్లో మోదీ రెండు కోట్ల ఉద్యోగాలు కల్పిస్తామని హామీ ఇచ్చారు. ఆ హమీ ఎంత వరకు నెరవేరిందో ఎన్ని ఉద్యోగాలు కర్పించామో లెక్కలు తేల్చాల్సిందిగా ఆయన కోరారు.

చెన్నై: తమిళనాడులో కావేరీ మేనేజ్‌మెంట్‌ బోర్డును ఏర్పాటుచేసే విషయంలో మే 14న జల వనరుల శాఖ కార్యదర్శి వ్యక్తిగతంగా ముసాయిదాను సమర్పించాల్సిందిగా సర్వోన్నత న్యాయస్థానం ఈరోజు ఆదేశించింది. అలా చేయకపోతే కేంద్రం కోర్టు ఆదేశాలను ధిక్కరించినట్లే అవుతుందని స్పష్టం చేసింది. కావేరీ జలాల వివాదం కేసులో తాజాగా సుప్రీంకోర్టు కేంద్రాన్ని ఆదేశిస్తూ ఈ తీర్పు వెలువరించింది.

అగర్తలా : త్రిపుర రాజధాని అగర్తలాలోని సుభాష్‌నగర్‌లో త్రిపుర స్టేట్ రైఫిల్స్‌కు చెందిన ఓ జవాన్ తన భార్యాపిల్లలను చంపి.. ఆ తర్వాత తాను ఆత్మహత్య చేసుకున్నాడు. ఈ ఘటన మంగళవారం తెల్లవారుజామున చోటు చేసుకుంది. ఆత్మహత్య చేసుకున్న జవాన్‌ను మానిక్ లాల్ ఘోష్(40)గా పోలీసులు గుర్తించారు.

జగిత్యాల: జిల్లాలోని మల్లాపూర్ మండలం కుస్తాపూర్ గ్రామంలో పలువురు కూలీలు ఉపాధి పనుల నిర్వహణలో భాగంగా మట్టి గడ్డలు తవ్వుతున్నారు. మట్టి పెళ్లలు ఒక్కసారిగా మీదపడడంతో సరికెల ముత్తమ్మ(50), జెల్లా పోసాని, సరికెల రాజు(55) అనే కూలీలు అక్కడికక్కడే మృతిచెందగా, మరో 6గురు కూలీలు తీవ్రంగా గాయపడ్డారు. కాగా... గాయపడ్డ వారిని మెట్‌పల్లిలోని ప్రభుత్వాసుపత్రికి తరలించారు.