న్యూఢిల్లీ, జనవరి 3: పార్లమెంట్ బడ్జెట్ సమావేశాలు 31నుంచి ప్రారంభం కానున్నాయి. హోంమంత్రి రాజ్‌నాథ్ సింగ్ అధ్యక్షతన మంగళవారం జరిగిన పార్లమెంటరీ వ్యవహారాల మంత్రివర్గ ఉపసంఘం భేటీలో ఈమేరకు నిర్ణయించారు. తొలిరోజు పార్లమెంట్ సెంట్రల్ హాల్లో ఉభయ సభలను ఉద్దేశించి రాష్టప్రతి ప్రణబ్ ముఖర్జీ చేసే ప్రసంగంతో 2017-18 బడ్జెట్ సమావేశాలు ప్రారంభమవుతాయి. అదే రోజున ఆర్థిక సర్వేను ప్రవేశపెడతారు.

తిరుపతి, జనవరి 3: శాస్త్ర సాంకేతిక రంగాల్లో ఎప్పటికప్పుడు తలెత్తుతున్న సవాళ్లనే అవకాశాలుగా మార్చుకుని భారత్ ముందుకు సాగాలని ప్రధాని మోదీ పిలుపునిచ్చారు. కొత్త ఆవిష్కరణలతో సృజనాత్మక జిజ్ఞాస దేశవ్యాప్తంగా విలసిల్లాలని ఆకాంక్షించారు. ఈ రంగాల్లో భారతావని అద్వితీయంగా రాణించాలంటే బాల్యదశలోనే పిల్లల్లో పరిశోధనాసక్తి, అవగాహనను పెంపొందించాలన్నారు.

ముంబయి, జనవరి 2: నూతన సంవత్సరం సందర్భంగా ప్రధాని నరేంద్ర మోదీ ప్రకటించిన పథకాలను బిజెపి మిత్రపక్షం శివసేన ఎద్దేవా చేసింది. యుపిఏ హయాంలో ప్రవేశపెట్టిన పథకాలనే మార్చి ప్రకటించారని ప్రధానిపై విరుచుకుపడ్డారు. పెద్దనోట్ల రద్దుతో ప్రజల అవస్థలు పడుతుంటే పరిష్కారం చూపలేకపోయారని శివసేన అధికార పత్రిక ‘సామ్నా’లో విమర్శించారు.

బాలాసోర్ (ఒడిశా), జనవరి 2: భారత్ అగ్ని-4 బాలిస్టిక్ క్షిపణిని సోమవారం విజయవంతంగా పరీక్షించింది. అణుపదార్థాలను మోసుకెళ్తూ నాలుగు వేల కిలోమీటర్ల దూరంలో గల లక్ష్యాన్ని ఛేదించగలిగే సామర్థ్యం గల ఈ వ్యూహాత్మక క్షిపణిని ఒడిశా తీరంలో ప్రయోగాత్మకంగా పరీక్షించారు.