హైదరాబాద్, ఫిబ్రవరి 5: గ్రేటర్ హైదరాబాద్ ఎన్నికల్లో తొలిసారిగా పోటీ చేసిన తెలంగాణ రాష్ట్ర సమితి చారిత్రక విజయం సాధించింది. హైదరాబాద్ చరిత్రలోనే తొలిసారిగా 99 స్థానాల్లో విజయం సాధించి కొత్త రికార్డు సృష్టించింది. వంద సీట్లు గెలుస్తామని చెబుతూ వచ్చిన టిఆర్‌ఎస్ 99 స్థానాల్లో విజయం సాధించి సంభ్రమాశ్చర్యాల్లో ముంచెత్తింది. ఎవరూ ఊహించని స్థాయి విజయం. టిఆర్‌ఎస్ నాయకత్వం సైతం ఊహించని విజయం.

నాగార్జునసాగర్, ఫిబ్రవరి 5: నాగార్జునసాగర్ జలాశయం నుండి కృష్ణాడెల్టాకు శుక్రవారం రాత్రి నుండి నీటివిడుదలను జెన్‌కో అధికారులు ప్రారంభించారు. కృష్ణాడెల్టా పరిసర ప్రాంతాలలో తాగునీటి అవసరాల నిమిత్తం 4టిఎంసిల నీటిని విడుదల చేసే విధంగా కృష్ణానది యాజమాన్య బోర్డు నిర్ణయం మేరకు శ్రీశైలం జలాశయం నుండి సాగర్ జలాశయంకు నీటివిడుదల చేస్తున్నారు.

హైదరాబాద్, ఫిబ్రవరి 5: ఆంధ్రప్రదేశ్‌లో నూతన పెన్షన్ పథకం (సిపిఎస్) వర్తించు ఉద్యోగ, ఉపాధ్యాయుల ఖాతాలకు సంబంధించిన బ్యాలెన్స్ షీట్ వివరాలు త్వరలో ఖజానా శాఖ వెబ్‌సైట్‌లో అందుబాటులో ఉంటాయని రాష్ట్రోపాధ్యాయ సంఘం (ఎస్‌టియు) తెలిపింది.

హైదరాబాద్, ఫిబ్రవరి 5: జగన్ అక్రమాస్తుల కేసులో ఈ నెల 29వ తేదీ వరకు విచారణ జరపరాదని ఎన్‌ఫోర్స్‌మెంట్ డైరెక్టరేట్ ప్రత్యేక కోర్టును హైకోర్టు ఆదేశించింది. అదే సమయంలో ఈ నెల 29వ తేదీలోగా ఈ కేసును ఎన్‌ఫోర్స్‌మెంట్ డైరెక్టరేట్‌కు బదలాయించాలా లేదా అనే విషయాన్ని నిర్ణయించాలని హైకోర్టు సిబిఐ ప్రత్యేక కోర్టును ఆదేశించింది. ఈ ఆదేశాలను హైకోర్టు న్యాయమూర్తి జస్టిస్ రాజా ఎలాంగో జారీ చేశారు.