తిరుపతి, జూలై 27: చంద్రగ్రహణం కారణంగా శుక్రవారం తిరుమల శ్రీవారి ఆలయాన్ని మూసివేశారు. శుక్రవారం రాత్రి 11.54 గంటలకు చంద్రగ్రహణం ప్రారంభమై శనివారం తెల్లవారు జామున 3.49 గంటలకు ముగుస్తుంది. గ్రహణం సందర్భంగా సాయంత్రం ఆలయాన్ని మూసివేసిన టీటీడీ అధికారులు శనివారం ఉ. 4.15 గంటలకు సుప్రభాత సేవ, నిత్యార్చన, శుద్ధి కార్యక్రమాల అనంతరం ఆలయ మహాద్వారం తలుపులు తెరుస్తారు.

అమరావతి, జూలై 27: విభజన చట్టప్రకారం రాష్ట్రానికి రావాల్సినవి కేటాయించకుండా, ఎన్నికల సందర్భంగా ఇచ్చిన హామీలు నెరవేర్చకుండా విస్మరించడం యూటర్న్ తీసుకోవటం కాదా అని కేంద్రాన్ని ముఖ్యమంత్రి చంద్రబాబునాయుడు ప్రశ్నించారు. బీజేపీ పాలిత రాష్ట్రాలకు పెద్దఎత్తున కేటాయింపులు జరుపుతూ మరోవైపు విభజనతో నష్టపోయిన ఆంధ్రప్రదేశ్‌ను ఆదుకునే విషయంలో వివక్ష ప్రదర్శించటమే ఇందుకు నిదర్శనమన్నారు.

హైదరాబాద్: తెలంగాణ, ఆంధ్రప్రదేశ్ ఇరు రాష్ట్రాల మంచినీటి అవసరాలకు కృష్ణానది నీటి విడుదలకు యాజమాన్య బోర్డు శుక్రవారం ఉత్తర్వులు జారీ చేసింది. తెలంగాణకు 30 టీఎంసీలు, ఆంధ్రప్రదేశ్‌కు 25 టీఎంసీల నీటిని కేటాయించినట్టు బోర్డు జారీ చేసిన ఉత్తర్వులలో పేర్కొంది. అలాగే శ్రీశైలం జలాశయం నుంచి శనివారం నుంచి (జూలై 28) ఆగస్టు 22 వరకు 26 రోజుల పాటు రోజుకు 2 టీఎంసీల నీరు విడుదలకు బోర్డు అనుమతించింది.

అమరావతి: ఎట్టకేలకు లారీ ఓనర్స్ అసోసియేషన్ యజమానులు సమ్మె విరమిచారు. కేంద్రప్రభుత్వంతో లారీ యజమానుల అసోసియేషన్ జరిపిన చర్చలు సఫలం కావడంతో సమ్మె విరమించాలని నిర్ణయించినట్లు ఏపీ లారీ ఓనర్స్ అసోసియేషన్ ప్రధాన కార్యదర్శి ఈశ్వర్‌రావు తెలిపారు. తమ సమస్యల కోసం దేశవ్యాప్తంగా లారీ యజమానులు గత వారంరోజులుగా సమ్మె చేపట్టిన విషయం విదితమే.