ప్రభుత్వ చిత్తశుద్ధి లోపమే రాష్ట్రంలో తెలుగు భాషకు శాపంగా మారింది. నవ్యాంధ్రలో తెలుగు భాష అమలు విషయంలో ప్రభుత్వం అనుసరిస్తున్న వైఖరి ఏమాత్రం సహేతుకం కాదు. ఎన్నికల ముందు టీడీపీ విడుదల చేసిన మేనిఫెస్టోలో తెలుగు భాషకు పూర్వవైభవం సహా పలు అంశాలను పేర్కొంది. అధికారం చేపట్టి మూడున్నరేళ్లు గడిచినప్పటికీ మేనిఫెస్టోలో తెలుగు భాషాభివృద్ధికి సంబంధించి ఇచ్చిన హామీని నెరవేర్చింది లేదు.

తెలుగు భాష అమలులో ప్రభుత్వానికి గాని, ప్రజలకు గాని చిత్తశుద్ధి లేదు. ఇంగ్లీష్ విద్యపై మోజుతో తల్లిదండ్రులు తమ పిల్లలను ఆ మీడియం పాఠశాలల్లో చేర్పిస్తున్నారు. ప్రభుత్వం అన్ని రకాల పాఠశాలల్లోను తెలుగు సబ్జెక్టును తప్పనిసరిగా చేయాల్సివుంది. ఈ దిశగా ఇటీవల తెలంగాణ ప్రభుత్వం ఇంటర్మీడియట్ వరకు తెలుగును తప్పనిసరిగా చేయడం మంచి పరిణామం.

ఎంతో మధురమైన తెలుగు మృతభాషగా మారకముందే ప్రజలు, ప్రభుత్వం రెండూ మేల్కొనాల్సిన అవసరం ఎంతైనా ఉంది. పక్కనే ఉన్న తమిళనాడు రాష్ట్రంలో అక్కడి ప్రభుత్వంతోపాటు ప్రజలు కూడా తమ భాషకు ఇచ్చే ప్రాధాన్యత చూసైనా తెలుగువారిలో మార్పు రావాలి. ప్రభుత్వం తన వంతు ప్రయత్నాలకు, ప్రజల సహకారం ఉంటేనే తెలుగుకు మనుగడ ఉంటుంది. ప్రభుత్వ, ప్రైవేటు కార్యాలయాలు, దుకాణాల పేర్లన్నీ తెలుగులోనే ఉండేలా ప్రభుత్వం ఆదేశాలు ఇవ్వాలి.

నాగరికత ఉన్న ప్రతి జాతి మాతృభాష ద్వారానే ప్రపంచాన్ని చూస్తుంది. మాట్లాడుతుంది. మాతృభాషలో మాట్లాడకుండా, పరాయి భాషలో మాట్లాడే వారు ఎంతపెద్దవారైనా వారి భావ వ్యక్తీకరణలో లోపం కనిపిస్తుంది. మాతృభాష అంటే తల్లి భాష. మనం ఏ సమాజంలో అయితే జన్మించామో, ఆ సమాజంలో మన ఇంట్లోను, ఇరుగు పొరుగు, రాష్ట్రంలోను మాట్లాడే భాషను మాతృభాష అంటాం. మాతృభాష పట్ల చిన్న చూపు తగదు.