అనంతపురం కల్చరల్, జూన్ 17: రాష్ట్రంలో కరవును పారద్రోలి సస్యశ్యామలం చేయాలని ముఖ్యమంత్రి చంద్రబాబు నాయుడు కృతనిశ్చయంతో ఉన్నారని మంత్రి సునీత అన్నారు. అందుకే కరవు జిల్లాలో పెద్ద ఎత్తున మొక్కలు నాటే కార్యక్రమం చేపట్టామన్నారు. శుక్రవారం నగరంలోని రాంనగర్‌లో మొక్కలు నాటిన మంత్రి మాట్లాడుతూ ప్రతి ఒక్కరు సామాజిక బాధ్యతగా మొక్కలు నాటాలన్నారు.

గుంతకల్లు, జూన్ 17: కేంద్ర ప్రభుత్వం అనుసరిస్తున్న రైల్వే ప్రైవేటీకరణ విధానాల వల్ల దేశభద్రతకు పెను ప్రమాదం సంభవించే ప్రమాదం ఉందని దక్షిణ మధ్య రైల్వే జోనల్ కార్యదర్శి సిహెచ్ శంకర్రావు అన్నారు. శుక్రవారం స్థానిక డిఆర్‌ఎం కేంద్ర కార్యాలయం వద్ద ఏర్పాటు చేసిన బహిరంగ సభలో ఆయన మాట్లాడుతూ రెండేళ్ల ఎన్‌డిఏ పాలనలో కార్మికులు, కర్షకులు, అసంఘటిత రంగ కూలీల సంక్షేమాన్ని పూర్తిగా విస్మరించారన్నారు.

హిందూపురం టౌన్, జూన్ 17 : ప్రభుత్వం ఈనెల 20వ తేదీ వరకు మాత్రమే బదిలీలకు అనుమతించడంతో ఉద్యోగుల్లో గుబులు రేగుతోంది. ఎక్కడికి బదిలీ అవుతామో అని ఆందోళన చెందుతున్నారు. దీనికి తోడు మున్సిపాలిటీల బదిలీల కౌనె్సలింగ్ శుక్రవారం ప్రారంభం కావడం, ఉద్యోగుల నుండి ఆఫ్షన్‌లు తీసుకుంటుండటంతో ఆందోళన తారాస్థాయికి చేరింది. సొంత ప్రాంతాలకు వెళ్లేందుకు పలువురు మున్సిపల్ ఉద్యోగులు ఆసక్తి చూపుతున్నారు.

పెనుకొండ, జూన్ 17 : మండల పరిధిలోని మంగాపురం చెందిన శిల్ప (20) శుక్రవారం రైలు కింద పడి ఆత్మహత్యకు పాల్పడింది. ఆమె స్వగ్రామం చెనే్నకొత్తపల్లి మండలం పుల్లన్నగారిపల్లి కాగా పది నెలల క్రితం మంగాపురంలోని నాగిరెడ్డికి ఇచ్చి వివాహం చేశారు. శుక్రవారం ఆమె భర్తతో గొడవపడి మనస్తాపానికి గురై ఆమె ఆత్మహత్య చేసుకుంది. హిందూపురం రైల్వే పోలీసులు కేసు దర్యాప్తు చేస్తున్నారు.