హైదరాబాద్, డిసెంబర్ 22: దేశ వ్యాప్తంగా ప్రభుత్వ రంగ సంస్థల్లో పని చేస్తున్న కార్మిక వర్గాలకు వ్యతిరేకంగా కేంద్ర ప్రభుత్వం అవలంబిస్తున్న విధానాలకు నిరసనగా చేపట్టనున్న దేశ వ్యాప్త సార్వత్రిక సమ్మెను జయప్రదం చేయాలని కేంద్ర, రాష్ట్ర కార్మిక సంఘాలు ఐక్యంగా పిలుపు ఇచ్చాయి.

అహ్మదాబాద్, డిసెంబర్ 22: సమాజాన్ని కులాలు, మతాల పేరుతో విభజించి రాజకీయంగా లబ్ధిపొందాలనే శక్తులపై భద్రతా ఏజన్సీలు అప్రమత్తంగా ఉండాలని, దేశానికి ఈ శక్తుల వల్ల ప్రమాదం పొంచి ఉందని ప్రధానమంత్రి నరేంద్రమోదీ అన్నారు. దేశాన్ని తీవ్రవాదంతో విచ్ఛిన్నం చేయాలనే చీకటి శక్తులు, సంస్థలపై నిఘా పెట్టాలని ఆయన పోలీసులను కోరారు. దేశమంతా ఒక్కటే అనే సమభావాన్ని పెంపొందించేందుకు కృషి చేయాలని ఆయన పోలీసులను కోరారు.

చెన్నై: రాబోయే లోకసభ ఎన్నికల్లో పోటీ చేస్తామని మక్కల్ నీధి మయ్యమ్ అధినేత, సినీ నటుడు కమల్‌హాసన్ వెల్లడించారు. ఆయన తన పార్టీని ప్రజల్లోకి తీసుకువెళ్లేందుకు తమిళనాడులో పర్యటిస్తున్నారు. ఈ సందర్భంగా మీడియాతో మాట్లాడుతూ ఎన్నికల్లో భావసారూప్యత గల పార్టీలతో పొత్తులు పెట్టుకోనున్నట్లు తెలిపారు. కూటమిలో చేరతామా లేదా కూటమికి నాయకత్వం వహిస్తామా అనేది ఇపుడే చెప్పలేమని అన్నారు.

న్యూఢిల్లీ: గూడ్స్ అండ్ సర్వీస్ టాక్స్‌ను 40 రకాల వస్తువులపై తగ్గించారు. ఈ మేరకు ఇక్కడ జరిగిన జీఎస్టీ సమావేశంలో నిర్ణయం తీసుకున్నారు. సాధారణ ప్రజలకు అవసరమైన నిత్యావసరాలను ఈ పరిధిలోనికి తీసుకువచ్చారు. దాదాపు 40 రకాల వస్తువులను జీఎస్టీ పన్ను పరిధిని 18 నుంచి 12కు తగ్గించారు. అలాగే మరికొన్ని వస్తువులను 5శాతం పన్ను పరిధిలోకి తీసుకువచ్చారు. జీఎస్టీ మండలి సమావేశం ఇంకా కొనసాగుతుంది.